› 選擇地區
三藩市
紐約
洛杉磯
其他美國地區
香港 台灣 北美
 
2007年11月27日

敏妮Talk:銀行按揭加息陸續嚟 - 溫敏妮

中銀帶頭加按息,相信樓市會升得更急。 資料圖片

敏妮曾經講過,想知樓市幾時爆升,睇吓銀行幾時加按揭息。原因係噚日有報道話,中銀調高新造樓宇按揭息率,報道話,由於作為香港按揭市場一哥嘅中銀,已經做夠今年quota。

做夠quota睇住加

咁又難怪,當你都賺夠,當然唔怕吊高嚟賣,敏妮相信按揭息仲會繼續加,而且唔單止係中銀加,而係全城銀行一齊加,結果係樓市會飆升得更急,升幅更大。
首先喺銀行層面嚟睇,當行家加咗按揭息,但生意仍然有增無減,銀行自然會跟住加,呢個情況不斷循環,所以按揭市場應該會進入加息周期。
喺樓市買家層面嚟睇,相信大家都應該認同敏妮所講,家陣樓市已經要高價追貨,因為多咗人相信,仲唔入市,遲啲樓價就會更高。不過,買樓成本唔止樓價,仲有另一筆更大開支係按揭利息,如果投資者知道除咗樓價要追,按揭息亦要追,你仲唔飛身撲入市買樓!更加多人盲目撲入市,樓價點會唔升。

追價追息爭買樓

契大佬Kenny問:「敏妮你年頭已經話要買樓,近排又不斷話樓市升,但你到𠵱家仲未買到喎!」敏妮只想講,唔係唔想takeaction,曾經有一層樓,敏妮好鍾意,更加通過晒auntie方同阿姨嘅嚴謹測試,不過,業主之前已經幫租客簽咗新租約,敏妮唔想連租約買。據地產代理講,業主係長線投資,但由於唔止一層樓收租,佢同業主傾過,業主相約一年後再傾。
當然近排樓市升,如果把握到機會,敏妮唔介意炒一轉,但資金有限、機會唔輪到敏妮;而年初敏妮嘅買樓決定,係為咗自住唔係炒,樓市一樣有起跌,所以唔使急住入市,如果業主仲記得一年之約,咪睇吓明年樓市走勢點再決定。
網誌: http://manlitalk.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載