› 選擇地區
三藩市
紐約
洛杉磯
其他美國地區
香港 台灣 北美
 
2007年11月27日

股場放大鏡:招金礦業基金揸重貨 - 歐陽風

恒指急升過千點,與其說是四叔百億資金入市推高,倒不如說是感恩節完咗,聖誕前嘅美股例牌升市所帶動,中國股市噚日表現偏弱,應視為好事,起碼宏調壓力又少咗。
港股忽然轉強,後市發展如何?由於今次大調整唔多見基金大規模的減持行動,故此相信揸重港股嘅基金喺年結前有好大誘因推高番啲股價,尤其係一啲近期調整幅度甚大嘅中資股。日前中資股以資源股表現較強,而除咗石油及煤炭股之外,金礦股仍然值得看高一線。
昨日紫金(2899)股價急升13%,相對之下,招金礦業(1818)升10%,仍有追落後空間。中央最近限制外商投資國內礦業,其實等於變相增加國有礦商的投資機會,另一方面,中央亦鼓勵礦商走出去,如紫金最近已聯同其他企業,收購秘魯的銅礦商Monterrico。

收購金礦屆最後階段

招金礦業亦有計劃走出去,據外電引述集團管理層稱,該公司計劃投資加拿大或澳洲的金礦,有關兩個投資金礦項目或入股金礦企業的談判正在進行中。股權資料顯示,招金近期獲Mirae資產管理積極增持,而H股持股最多係Atlantis,揸16.21%,已申報持逾5%的基金已持逾55%的H股,係不折不扣嘅基金股,博粉飾窗櫥招金無得走雞。

東亞銀行現位買得過

中銀香港(2388)突宣佈調高按息,150萬元以下樓按貸款利率調高0.15%,背後反映嘅係,中銀唔怕市場競爭,由於預期樓按需求大,加咗按息都唔怕無生意,相信其他大銀行加按息係遲早嘅事。
中銀香港剛宣佈以較市場溢價10%嘅價錢,收購東亞銀行(023)4.94%股權,涉資多達40億元,市場評論多認為中銀只是尋求穩定收益而風險低的投資,而非有購併計劃,但係既然中銀覺得東亞係穩陣投資,兼以51元高價買貨,應該唔會差得去邊,現位買得過。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載