› 選擇地區
三藩市
紐約
洛杉磯
其他美國地區
香港 台灣 北美
 
2008年02月11日

風水師邊個最準?
中環在線:豬年測市檢閱 - 李華華

楊天命:有錯認錯,最準都係我
設計對白

踏入鼠年,堪輿學家亦順應(股)民意,除咗講生肖運程,亦預測股市。三位著名堪輿學家蘇民峰、楊天命同麥玲玲,都有預測鼠年嘅股市,呢幾日大家應該聽唔少,正所謂「風水佬呃你十年八年」,鼠年股市預測要到年底先知準唔準,到時已經冇仇報,所以華華大膽嚟個往績大檢閱,信得過先好跟嘛!
曝光率奇高嘅麥玲玲舊年初話,豬年股市波動,好大機會有股災,好可能喺新曆10月份出現。結果成個新曆10月個市升到嘭嘭聲,到10月30號收市仲上到31638高位。不過,麥師傅舊年10月尾補飛話,農曆計,要過埋立冬(即係11月8號)先算大步檻過,點知過咗立冬,個市仲凶險。
至於蘇民峰就話,夏季股市表現突出,秋季較弱,咁暑假期間股市都有小股災出現,唔知算唔算突出呢?上年9至11月秋凉時分,股市一衝上高位後就倒插,照計蘇師傅都啱一半。

睇準變估錯

原來07豬年股市預測,比較準嘅係曾經承認「占錯卦、估錯市」嘅楊天命,喺佢嘅豬年運程書話,恒指將突破2萬點,但亦會大幅上落,加上美國有股災,跟風嘅人會損手而回。咪話2萬點,上年10月恒指直頭衝過3萬點,但鼠年未到,港股就受美國次按拖累跌返落2萬幾點。楊師傅如果舊年10月唔喺自己個blog度估,10月17號同29號港股會出現大調整,跌700幾點,最準應該係佢,因為嗰兩日港股不跌反升,呢一點唔知楊師傅之前有冇算到呢呵!
至於鼠年個市又點睇?蘇師傅三言兩語概括──先跌後升;楊師傅預測港股暢旺波幅大;至於麥師傅就話全年平穩向上,冇豬年升得咁瘋狂,佢仲提醒散戶08北京奧運過後,股市表現較波動。

玄學家鼠年經濟預測

《蘇民峰》
上半年跌,下半年升,但不會發生股災。西曆5月6日跌幅明顯,8月8日節節上升,建議5月6日前後趁低吸納,8月8日前後見高沽出

《楊天命》
大陸股市升至前所未見的高點後大調整,港股暢旺,但波動大,6月份為高峯。樓市穩步向上

《麥玲玲》
農曆正月及2月投資氣氛不尋常;3月動盪,4、5月表現不俗,6月大起大落,由好變壞,7月氣氛低迷,8月好壞參半有暗湧,年尾回復穩定

電郵:mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載