› 選擇地區
三藩市
紐約
洛杉磯
其他美國地區
香港 台灣 北美
 
2008年06月06日

專家對話:吸中資股等多陣

港股悶市,成交量只得639億,幸好守得住24000點水平,香港散戶可能因為內地政策因素不明朗,影響對中資股熱情減卻,反而轉炒本地藍籌股如滙控(005),專家認為散戶對內地宏調有憂慮,因而影響中資股估值,短期有可能跑輸藍籌,但長遠計,藍籌盈利增長仍難追上中資股,待中央政策消息消化後,中資股會重新造好。

郭:郭家耀 楊:楊慧玲

楊:中資股受政策因素影響下跌,現時係唔係低吸好時機?
郭:𠵱家只係調整咗兩日,沽盤未必咁快顯現晒,我覺得仲有水位可以等一等,特別要等美國就業數據,相信都會左右市況,加上嚟緊有長假期,既然成交量咁細,市況又唔係太波動,就一動不如一靜,有時唔做嘢都係上算。
楊:有啲人覺得升市會喺節日之後開始?
郭:唔能夠排除,因為近日見到恒指落返25000點水平,再跌到24000點就跌唔到落去,證明沽壓唔係太大,但係又無咩嘢特別消息推動上升,如果美國就業數據好過預期,港股有條件上返25000點水平。

首國不妨揸住先

李太:想問吓首長國際(697),𠵱家跌到咁低,使唔使止蝕?
楊:點解你睇好佢?
李太:我見有報紙睇好,加上又打過嚟問專家,話短線快獲利喎。
郭:首長國際市盈率已經好低,佢前景未至於好差,但短期走勢係會差少少,因為原材料物價前景不明朗,我覺得市盈率咁低,風險因素已經計埋喺股價入面。
楊:內地政策影響佢好大,近期徘徊喺2.4蚊,如果跌穿呢個位,係唔係要止一止蝕?定係坐一坐艇先?
郭:佢走勢的確係已經去到一個好重要嘅支持位,如果跌穿咗技術走勢就會好差,但市盈率咁平,已經計埋好多風險因素喺入面,就算鋼價唔升,佢今年盈利都唔會太差,可以持有住先。

旺角李太個案
買入價:2.7元
目標價:-
止蝕價:-
時期:一星期

財險止蝕位5.8蚊

陳先生:我星期二以6.22蚊買咗中國財險(2328),我睇佢一個月會升到7蚊左右,之後就放。
楊:7蚊算唔算貪心?都成一成喎。
郭:股價走勢去到呢啲位已經貼近幾重要嘅支持位,所以博佢公佈中期業績之後反彈上7蚊都唔難。不過要定番止蝕位喺5.8蚊,因為財險基本因素弱過中國人壽(2628),中國內地車險競爭好激烈,所以做到好平,財險喺保單方面賺唔到錢。
楊:我聽朋友講,內地買車險真係好平,更加一個月可以索償兩次,仲要好容易索償,所以個保費好容易就回番本,咁我都好懷疑財險係咪真係賺到錢。
郭:競爭環境唔係幾利好佢,攞好高嘅盈利增長,所以財險真係唔值得長揸。

藍田陳先生個案
買入價:6.22元
目標價:7元
止蝕價:5.8元
時期:一個月

中煤落返15蚊入貨

張小姐:我想問嗰隻中煤能源(1898),幾多錢先入得過呀?
楊:佢股價會唔會急挫去到一個月前價位,甚至下試更低位呢?
郭:今次限電煤價措施對煤股影響唔大,因為只減10蚊左右。反而係巿場擔心其他省分會陸續實行電煤減價,所以陝西省實行埋呢個措施後就觸發大調整;不過好多煤炭公司年初已經簽咗好多合同煤,今年業績增長好安全。雖然短期煤炭股會受壓,但係你可以等佢下試返15蚊先入貨。
楊:中煤呢兩日跌得咁厲害,稍後會有技術反彈,股價低過15.5蚊都可以入貨。
郭:煤炭股好玩在當政策風險消息一過,反彈力就會好大,起碼都超過一成,所以上望18蚊都幾理想。
楊:不過可能要揸兩三個月先有回報。

上水張小姐建議
建議買入價:-
目標價:18元
止蝕價:-
時期:兩個月

每日收市後4:30pm

歡迎click入 http://finance.appledaily.com 以webcam參與節目及收看

歡迎phonein28698262暢談心得
亦可email至mailto:finance@appledaily.com搶先貼股

今日嘉賓:

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載