› 選擇地區
三藩市
紐約
洛杉磯
其他美國地區
香港 台灣 北美
 
2008年06月06日

重翻家族內訌史
中環在線:羅旭瑞「離家門保富豪」 - 李華華

羅旭瑞話自己不止對富豪有好深感情,同家族既關係都好好㗎﹗ 李潤芳攝

新地(016)郭氏三兄弟內訌,搞到鬧上法庭,最後要郭老太出山擺平,睇報紙報道,好睇過電視劇,有冇「續集」,華華拭目以待。講起華資企業嘅「豪門恩怨」,廿幾年前,鷹君(041)羅氏嘅家族內訌,一樣哄動。當年事件主角、富豪(078)主席羅旭瑞噚日喺股東會後,被記者問起當年事,按捺不住要為自己平反,強調呢宗家族企業交易絕非「敵意收購」。

一份傲氣拒澄清

華華睇過一啲講華資企業風雲嘅書,提到羅氏家族呢段歷史,將羅旭瑞形容到好似吳三桂引清兵入關咁。羅旭瑞話,自己有份傲氣,事件發生以嚟都唔多出聲,想唔到事隔廿幾年俾人攞嚟翻炒,所以一五一十同大家講清事件來龍去脈……
佢話,富豪由成立第一日開始,佢已經一手策劃,規模由細做到大,佢都積極參與。當年富豪由鷹君持有33%權益,佢本人直接持有10%。82至84年,中英就香港主權談判,經濟下滑,好多本港大型公司嗰段時間都出現財政困難,鷹君亦係其中之一。

假手於人再購回

當時鷹君同部份家族成員提出要「棄車保帥」,建議出售富豪同百利保(617),套現支持鷹君。對富豪有深厚感情嘅羅旭瑞,唔忍心將自己一手帶大嘅富豪轉手他人,而且對富豪前景有信心,於是介紹咗著名嘅公司醫生韋理向鷹君購入富豪股權,仲比鷹君提出嘅底價高出三成,佢認為咁做對兩邊都有好處。兩年之後,羅旭瑞從韋理手上購回富豪股權,並從此脫離家族生意。
羅旭瑞話,外界形容呢次交易係敵意收購,有欠公平,富豪透過重組,生意越做越大。佢仲話,當時雖然同家族因事件有啲爭拗,但之後佢哋兄弟間關係仍然好好,至今每個禮拜都有家庭聚會。
電郵:mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載