› 選擇地區
三藩市
紐約
洛杉磯
其他美國地區
香港 台灣 北美
 
2008年06月26日

中環在線:風神壓頂深圳股照炒 - 李華華

颱風「風神」襲港,噚日高掛8號風球,到臨近晏晝先至改掛3號強風信號。人命關天,港交所(388)朝早休市,散戶上晝冇得炒股,到晏晝先至復市。
唔知係香港人特別錫身,定係祖國同胞,銀要緊。雖然風神直情登陸深圳,但深圳交易所毋懼颱風威脅,發揮祖國搵銀精神,「市照開,股照炒」,喺「風神」嘅正面吹襲下,仲越炒越旺,跑贏港股,對深圳散戶嚟講,「風神」簡直變咗「股神」,慢吓手仲係「財神」㖭!

技術故障才停市

其實𠵱家交易都已經電子化,咁究竟係香港追唔上時代,吓吓都要有人返工先可以開市,定係大陸人唔怕危險最緊要賺錢呢?華華相信唔係。不過,係咪無論掛幾多號波,深圳股市都照開呢?答案:係!
喺大陸,颱風預警信號分為4級,分別以藍、黃、橙、紅4個顏色劃分,噚日深圳就發出黃色預警,即係平均風力達到8級以上,不過,根據《深圳證券交易所交易規則》,佢哋只會喺「不可抗力、意外事件、技術故障」嘅情況下先至會停市,打風除非吹冧佢哋嘅交易系統搞到技術故障,如果唔係,話之你紅色信號都掛埋,股市照開。
好似舊年9月,上海俾達16級風力嘅「韋帕」正面襲擊,需要發出紅色預警,上海交易所仍然毫無懼色,照舊開市,不過呢個颱風為上海股民帶嚟嘅唔係財氣,當時股市下跌29點。

電郵:mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載