› 選擇地區
三藩市
紐約
洛杉磯
其他美國地區
香港 台灣 北美
 
2008年12月24日

敏妮Talk:財政獨立保障自己 - 溫敏妮

結婚本是喜事,但財政獨立也有必要。 資料圖片

對於經濟同財務策劃嘅相關問題,敏妮可以經常喺Mr.B面前認叻,但一講到娛樂新聞,尤其呢期有乜娛樂圈新星,敏妮真係認晒輸。
不過,就算對娛樂新聞幾咁唔掌握,對於近排「才子玉女」嘅新聞,敏妮都唔會唔知。

同老婆分身家

仲記得佢哋宣佈結婚嗰日,敏妮收到好友公關C嘅SMS:「嘩!有冇病?佢冇人要?」雖然話人哋嘅感情事,外人冇必要插嘴,但作為「計較」嘅港女,敏妮第一個反應係,據聞玉女係圈中富婆,至於才子就好少有人用富豪嚟形容,好難衡量佢有冇錢,所以嫁畀佢唔緊要,最緊要各自財政獨立,日後有乜事發生,大家好來好去!
雖然咁講一定會俾人話敏妮計較兼冇情趣,但敏妮又真係認識唔少朋友,情到濃時乜都冇所謂,但一旦緣來緣去,就為錢銀爭拗。
敏妮曾經喺度提過一位朋友,因為嫁咗個冇佢咁有上進心嘅男人,結果屋企財政支出,大部份係個女嘅負責,本來兩夫妻冇乜分你我,弊在個男人有好多損友,佢聽埋唔少「噪音」,變得越嚟越自卑,搞到鬧離婚之餘,仲聽埋身邊家人同啲損友講,要同老婆分身家。最慘家陣男女平等,結果係點?一個字──煩!

為錢爭拗殺風景

雖然,好似為咗「避沙蟲」,寧願「斬腳趾」唔結婚,就誇張咗啲,但無論任何時候、無論男定女,財政獨立,幾時都係對自己一個保障。敏妮相信,每一段感情,開始時候都係浪漫溫馨,試諗吓,結束時居然要為錢銀爭拗,真係大殺風景。
今日係平安夜,敏妮都希望大家過得浪漫溫馨。

溫敏妮
http://wanmanli.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載