蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年05月05日

中環在線:船王曹文錦捐錢老董捧場 - 李華華

董建華(左)喺阿爸同級船王嘅Uncle曹文錦身邊,當堂變晚輩。 程志遠攝

香港四大船王中包玉剛、董浩雲、趙從衍已不在人世,健在嘅只有曹文錦,自從佢創立嘅萬邦集團喺02年撤銷上市地位,已經好難見到佢。噚日理大「萬邦曹文錦海事圖書館暨研究及發展中心」開幕,捐咗成千萬嘅曹文錦,由阿仔──萬邦主席曹慰德陪住到場,仲有世姪捧場,就係董浩雲長子、前特首董建華。董伯伯做特首時係萬人之上,佢噚日見Uncle,當堂變咗乖巧嘅晚輩。
呢位低調船王現年84歲,精神奕奕兼笑容滿臉。佢識講5種語言,除咗母語上海話,英文同普通話都流利,日文亦唔錯,廣東話就麻麻哋,佢話喺香港住咗成60年,都係唔多識講。

曾出口打救世姪

船王話,金融海嘯對航運嘅打擊,比80年代航運業低潮嘅仲大,因為金融海嘯係全球性,影響好深,有幾深就好難估,好在萬邦經歷過低潮後,營運都好小心,今次集團都有裁員但唔多。
講到80年代航運業低潮,相信董伯伯印象更深,東方海外(316)當年幾乎破產,好彩有霍英東代表阿爺出手相救;不過路邊社消息話,當年曹文錦都有開聲叫阿爺打救呢位世姪,唔知係咪咁,董伯伯見到曹Uncle特別熱情。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載