蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年08月10日
馬上成為壹會員

敏妮Talk:善用暑期工薪金 - 溫敏妮

辛苦搵嚟嘅錢,要好好運用,免得浪費了整個暑假又浪費了金錢。資料圖片

前排有位嚟緊將要入大學嘅朋友話,做暑期工賺到好幾千蚊,由於爸爸媽媽有畀零用錢,所以呢筆暑期工薪金,可全數儲起。佢問敏妮點樣善用呢幾千蚊嚟投資?
幾千蚊放喺銀行,家陣莫講話冇息收,分分鐘低過最低結存要畀月費。最直接嘅投資,首選股票,但得幾千蚊本,無理由因budget有限叫佢買細價股,家陣穩陣啲嘅藍籌股,入場費都要過萬蚊,over咗呢位年輕人嘅budget,碎股買入賣出都要蝕價。
敏妮諗嚟諗去,都覺得應該買股票,因為咁少錢買基金,扣埋認購費、手續費、管理費,買唔到幾多個基金單位。買股票成本輕過基金,但與其買碎股,不如的起心肝月供。敏妮建議佢每個月只係供1000蚊,雖然可以買到嘅股票唔多,但問題係,佢家陣就話有幾千蚊現金,夠供幾個月股票,當一旦新學期開始點算?

做兼職月供股票訓練恒心

敏妮建議佢搵份parttime,大學生做parttime好常見,早啲出嚟社會,學到同見到嘅嘢比課堂更多,而且只係應付1000蚊供款,應該唔算太大壓力,某些日子要應付功課考試,又可以暫時停供,畀自己有番啲彈性。其實最緊要訓練自己有恒心,累積財富。
至於供邊隻股票?呢個問題最難解決。敏妮建議兩隻,一係國壽(2628),呢隻係聽投資版某位前輩講嘅,佢話自己每逢低位就買,儲嚟畀對寶貝仔女。事實上,任何先進國家保險滲透率都好高,中國正值崛起,市民對保險需求只會不斷增加,反正作長線投資,睇好保險業前景,揀板塊裏面最大嗰隻嚟供。
另一選擇係盈富(2800),大市有升有跌,但睇往績都係向上,揀盈富有息派又唔怕跑輸大市。對於呢位投資新丁,勝在有大把時間,即使日後投資遇挫,仍有大把時間追番。
溫敏妮
http://wanmanli.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載