› 選擇地區
三藩市
紐約
洛杉磯
其他美國地區
香港 台灣 北美
 
2009年10月08日

中環在線:滙豐葛霖指銀行界 欠全球一聲道歉 - 李華華

自從獅子行上月底公佈,將集團中樞神經嘅行政總裁辦公室,由倫敦搬返香港之後,滙豐控股(005)嘅一眾高層就幾乎馬不停蹄冇唞過,日日向不同傳媒暢論發展大計同審時度勢,務求令到呢鋪半遷冊嘅壯舉繼續保持溫度,成為城中亮點。
金融海嘯發生,唔少人都話罪魁禍首乃華爾街嗰班貪婪無道嘅賓架,連一向穩健嘅獅子行,都因為買入滙豐融資,畀次按毒瘤纏身;而喺年初世紀供股中,5號仔股價又曾插水到得番33蚊。面對股東同傳媒係咪要鞠躬saysorry嘅提問,管理層一向都迴避唔肯答。
之不過,獅子行主席葛霖噚日出席世銀及國基會年會時,就對住國營嘅英國廣播公司BBC,發表整個銀行界「欠全球一聲道歉」(owestherealworldanapology)嘅偉論。喺近作《美好價值》一書中,高呼重建市場道德同良心價值嘅葛霖,認為銀行業要從金融海嘯中認真吸取教訓,有需要嚟一次文化改變,改善公眾對賓架嘅觀感,還世界一個公道咁話。之不過,佢好似仲未率先嚟一次道歉噃,咁可能要拉多幾個同行一齊開聲嘞。

強調「東遷」唔係背棄英國

葛霖話,今次滙控「東遷」總裁辦公室,並唔代表背棄英國。華華同唔少金融界中人傾開,佢哋都話獅子行無寶不落,揀喺國慶前夕公佈CEO辦公室回巢,應該係經過研究後,泊啱碼頭嘅長遠策略,對於所有瞄準大中華呢杯茶嘅外資企業,應該起到示範作用嘅。
李華華

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載