› 選擇地區
三藩市
紐約
洛杉磯
其他美國地區
香港 台灣 北美
 
2009年10月08日

青心直說:盡地一煲標尾會 - 胡孟青

一念天堂、一念地獄,剛怕完美國失業問題,咁快又為澳洲加息開香檳,無論大中小戶的進取心一時無兩,金融海嘯的教訓去咗邊?對唔住,學唔到,只知世事無常,金融市場既然都係一日天堂、一日地獄,倒不如博到盡,有幾多搶幾多,最緊要年尾份花紅有得派、基金交到功課,總之全民短炒王,乜嘢價值投資都係空話,「我應該冇咁唔好彩坐唔到最後一張音樂椅」。
世界黃金協會數字顯示,過去5年參與減持協議的央行只係沽咗協定的75%。美金快變廢紙,揸黃金係最好保證,因為目前各國救到GDP,救唔到真正經濟,英國第二季企業盈利能力跌到8年最低,企業唔賺錢、工人薪金縮,加埋通脹政府唔敢加息,再講落去,就會明白點解大戶趁市彈,IPO、豪宅、外滙、油、金、資源,通通都要賺到盡做最後一擊。

美維炒落後

美滙走勢正好配合,再跌至近一年低位,仲記得9月23日美滙指數由一年低位75.827反覆彈上10月1日的77水平,恒指變咗「跟得夫人」,反向走勢完全一致,睇過就明係乜嘢主導市況。資金冇眼亦冇情,總之睇到美滙加埋熊證街貨,下一站21500應該冇走雞。
人怕生壞命,股怕改壞名,美維控股(3313)潛水兩周年,終於浮上水面,仲連續兩日創新高。叫得「尾圍」果然開枱食大茶飯亦係最尾,炒完建滔積層板(1888)先到美維發威,原因都係無嘢好炒炒落後、炒供求。睇公司上半年業績毫不起眼,盈利按年跌66%至1億元唔夠。
要炒佢,唯一諗到係背後嘅唐翔千家族,亦即是政務司司長唐英年阿爸。目前美維由佢細佬妹唐慶年同唐英敏打理,而唐翔千揸住集團超過70%股權,非常集中。相比起建滔板仲喺破底水平,美維其志可嘉,上市以來總共派咗0.117元股息,對一眾艇民都算係咁。技術走勢亦唔差,由於一直冇乜人理,跌市唔關佢事,升市反而會炒落後,過去幾個月一直隨10日及20日線向上,睇嚟尾圍食餸尾反而有機會標尾會。
胡孟青

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載