› 選擇地區
三藩市
紐約
洛杉磯
其他美國地區
香港 台灣 北美
 
2009年12月02日

青心直說:耐性揸好股勝亂石投林 - 胡孟青

猶記得喺10月時,同大家講過海爾電器(1169)第四季等重組,有耐性嘅投資者,終於守得雲開,由兩蚊邊坐到上嚟4個幾,兩個月唔夠就升1倍,相信好多短炒王都望塵莫及,故事說明只要同優質股有緣相會,就要專一啲死咬唔放,到處拈花惹草往往得個桔。
海爾電器宣佈,手上有近32%股權嘅阿媽海爾集團,將會向青島海爾悉售1169全數股權,阿媽從此唔再直接持有1169。到時青島海爾將持有超過50%海爾電器股權,即係話青島海爾將會食咗香港上市嘅海爾電器。而呢個好媽媽就會繼續控住青島海爾,作為白色家電王國嘅統帥。其實針對業務分散喺A同H股兩個市場,海爾集團重組計劃早喺10月已漏口風,去年6月,青島海爾先收購海爾電器20.1%股權,如今再向阿媽買埋手頭32%股權後,重組故事經已大團圓結局。

海爾兩月升逾倍

呢次兩個大贏家海爾電器同A股上市嘅青島海爾,日後將可活於同一屋簷下,享受重組後嘅協同效應。青島海爾將繼續做最賺錢嘅空調同冰箱,1169則接力進軍家電下鄉落後板塊洗衣機同熱水器,特別係洗衣機,因為目前1169有超過七成收入來源係洗衣機業務。
兩支槍頭同向外,對付最大競爭對手係美的,因為美的併購小天鵝後,洗衣機市場佔有率由不足1%,急增至超過28%,步步進逼海爾電器32%嘅一哥地位。早喺整合呢個白色王國之前,青島海爾對高層派Option做激勵,講明每年公司複合增長率超碼要有18%,係行業中要求最高。
睇嚟呢個如意算盤如今更易打響,因為海爾電器半年賺1.6億元,相反青島海爾營業收入166億元人民幣,都只係賺6.7億元人民幣,收購完成後,1169盤數可以幫到青島海爾,仲有1169嘅10億元淨現金,可見阿媽呢次似乎益大佬多啲。
不過,兩兄弟邊有計,總之白色王國日後若能繼續做大做強,中央以舊換新政策冇變,股價自然水漲船高。但睇好還睇好,投資者要有心理準備,好消息出晒,股價震盪在所難免。

胡孟青

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載