蘋果日報 | APPLE DAILY
› 選擇地區
三藩市
紐約
洛杉磯
其他美國地區
2009年12月18日
馬上成為壹會員

青心直說:熊市來臨清倉過聖誕? - 胡孟青

大市連跌3日,100日線也告失守,好彩成交收縮,散戶患得患失,特別係持有內銀股的粉絲,心裏乾急着是否應該大清貨,沽清沽淨過聖誕。聽到聽眾,甚至電視台同事都大哭股喪的同時,腦裏即時響起郭富城名曲︰「我是不是該安靜的走開,還是該勇敢留下來,我也不知道那麼多無奈,可不可以都重來……」
買股票梗係唔同談戀愛,呢點亦係投資者要戒嘅惡習。多年來唔少人對思捷環球(330)有一份獨特情意結,就好比滙豐控股(005),因為佢哋兩隻都係陪着大家成長,幫補唔少家計,叻嘅甚至創業興家。可惜時移世易,長線投資唔係唔好,但經歷過金融海嘯,連大經濟學家都扯白旗投降,股市周期短之又短,投資者應改變策略,盡可能做花心蘿蔔,吸收各行各業資訊嚟分析大局,勝過死硬派追逐夕陽工業。

撈底不如買基建股

唔係話內地時裝市場係夕陽工業,只係唔明白,點解思捷幾年前一直強調要以歐洲市場為重心,當時確係風光過,賺歐元賺到手軟,亦係該股一大亮點。如今竟然又話歐洲業務短期唔會明顯改善,表示要重投神州大地懷抱,以近39億元喺華潤創業(291)手上買番內地合營公司嘅餘下權益,足足27倍市盈率,都幾貴。思捷主席高漢思夠膽死話,由於內地潛力大,作價高低與否唔重要。
好一句豪情壯語,未來增長動力,係咪真係有高先生講咁高?不如留意吓點解香港嘅EspritOulet生意亦唔係好得去邊,正店更唔多覺內地客嘅腳毛。
呢個正正係最好嘅反面教材,叫大家唔好咁盲目,此一時彼一時,唔當炒嘅板塊,你撈多少次底,都只係越撈越低。到底應唔應該沽貨清倉過聖誕?總之,只要一日仲有散戶問︰「係咪時候撈底買弱勢內銀股」,個市恐怕仲未跌完。小心駛得萬年船,既然坐咗艇而又有新錢,想撈底倒不如買基建股,因為累積跌幅已巨,以中交建(1800)落番7蚊邊,亦係眾多大基建股中毛利最高,現水平撈先真正真係「撈抵」。
胡孟青

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載