› 選擇地區
三藩市
紐約
洛杉磯
其他美國地區
香港 台灣 北美
 
2010年06月17日

歐豬五國 無個贏波
世盃近「豬」者黑? - 李華華

世界盃首輪比賽噚晚打完,今屆長買「細」就最有「錢途」,華華仲發現,近排債務纏身嘅歐豬五國(PIIGS,即葡萄牙、意大利、愛爾蘭、希臘同西班牙),真係頭頭碰着黑,唔知係咪政府無錢科水、獎金大縮,喺分組賽首round表現都好肉酸。
愛爾蘭一早已經喺世盃外圍賽嘅附加賽,被法國亨利隻「上帝之手」KO咗;貴為04年歐洲國家盃冠軍嘅希臘,畀南韓派咗兩隻蛋;上屆世盃盟主意大利,符符碌碌逼和巴拉圭;有C朗壓陣嘅葡萄牙,亦踢到不知所謂,只係悶和科特迪瓦;至於奪標大熱、擁有宇宙最強中場線嘅西班牙,亦爆出今屆世盃最大冷門,0:1輸畀瑞士。

CDS指數越高 攞世盃越難?

如果用CDS(信貸違約掉期)做參考,頭六個最大機會破產、而有份參加今屆世盃嘅國家,歐豬四國(唔計愛爾蘭)竟然上晒榜,以排位計,希臘第三高,唔通CDS高,攞世盃都難啲?
希臘剩低嘅分組賽會對尼日利亞同阿根廷,出線睇怕凍過水;葡萄牙對北韓同巴西,贏唔到朝鮮勇士,都可以執定包袱返鄉下。意大利呢?就算出到線,16強好可能對荷蘭,咁咪又係時候講byebye。家連鬥牛國狀態都咁沉,唔通真係近「豬」者黑?
國難當前,華華唔該有得打嗰四國踢番好啲,振奮一下國民,起碼好似北韓咁,俾啲heart人睇,而唔係傷口灑鹽。講開又講,華華嘅愛隊阿根廷,CDS指數居然爆晒燈,達1067點嘅全球第二高,不過數據嘅嘢,不嬲係俾人破嘅!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載