› 選擇地區
三藩市
紐約
洛杉磯
其他美國地區
香港 台灣 北美
 
2010年06月18日

青心直說:歐洲掃貨最佳時機 - 胡孟青

內地客端午節小黃金周盡情來港澳消費,消費零售濠賭股借勢爆上;民企都唔執輸,為資金找出路,唔敢炒樓炒豆炒大蒜,惟有走出去買嘢,仲越買越有建設性。
內地最大綜合民企復星國際(656)入股法國著名上市旅遊集團地中海俱樂部(ClubMed)7.1%股權,成為最大戰略投資者之一,雙方未有透露作價,但以公司昨日市值3.85億歐元(約37億港元)計,7.1%只不過2.62億港元,佔復星市值不足1%,但背後象徵意義卻不小。
香港人對ClubMed應該唔陌生,公司目前喺40個國家及地區擁有80座度假村,今年首季業績扭虧為盈,截至4月底止半年賺300萬歐元。

復星拓度假村有遠見

不過賺埋都唔夠蝕喺冰島火山灰一役,航班停飛嚴重影響生意,這亦是中國資金成功入股的主要原因。歐洲公司保護主義冇咁大,ClubMed仲高調宣傳呢個中國概念,頭炮係同新濠國際(200)旗下中國度假村(MCR)合作,投資10億元人民幣喺黑龍江亞布力打造中國首家五星級山地滑雪度假村。公司夥伴係內地最大信貸評級機構中國誠信信用管理(CCL),穆迪持股49%,CCL最近透過子公司WHL私人配售帶隊入局,何猷龍辭任MCR主席,日後WHL及MelcoLeisure將持有MCR約49.4%及28.7%權益。
ClubMed預期中國會成為集團第二大市場,隨着中國人均收入上升,休閒經濟將成為極具發展空間嘅新興第三產業。入股有助復星於現有醫藥、房地產、鋼鐵、金融等領域邁向多元化與高增值,配合國家發展路向,長遠係極具遠見嘅部署。
事實上,唔少內地企業趁歐元平走出去覓食,中央擺明大力支持,近期中國同希臘簽訂協議,豪擲幾十億歐元參與投資航運碼頭、電訊及地產等建設。咁嘅機會唔係時時有,反映中國唔止要利用「走出去」排洪,引導資金流向具建設性項目,更順勢打壓國內炒風,堂而皇之雪中送炭拯救世界,期望結交多幾個真正朋友,順便平衡美元資產風險,因為美國中期選舉前玩嘢機會甚高。
胡孟青

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載