› 選擇地區
三藩市
紐約
洛杉磯
其他美國地區
香港 台灣 北美
 
2010年07月02日

馬雲變風清揚 淘寶網CFO做逍遙子
中環在線:阿里巴巴武林高手雲集 - 李華華

阿里巴巴(1688)個舵手馬雲係金庸頭號粉絲係人都知,自命為華山派劍宗風清揚,又搞到自己個杭州總壇裏面武林勝地雲集(例如啲會議室叫「光明頂」、「俠客島」、「桃花島」……等等),但勢估唔到連佢旗下淘寶網班下屬,都要一齊玩角色扮演,真係何其過癮!

會議室叫光明頂桃花島

話說華華前日專程去貿易發展局同淘寶網個「淘寶商城」記招,搵淘寶網個CFO張勇換張卡片,真係唔換過都唔知,張總原來有個別號叫「逍遙子」!「逍遙子」係乜傢伙呢?張總話,咪《天龍八部》其中一個人物囉!原來逍遙子乃係虛竹嘅師傅,逍遙派嘅掌門人是也。
阿里巴巴個靚女公關,之後同華華講,其實淘寶網每個員工,都要響金庸啲小說裏面揀個角色,做自己嘅「淘寶花名」,好似CEO陸兆禧綽號就叫鐵木真;之不過咁,大家都唔可以揀「奸角」,但員工人數又過咗3000,所以要揀「朵」都頗有難度o架!
根據金庸原著解讀上述三位所揀嘅角色,馬雲係獨孤九劍,張勇就內功了得,而陸兆禧就深沉多智,呢啲咁強嘅組合,雄霸網上購物行業就應該無問題……bytheway,如果有朝一日,肥佬黎叫《蘋果日報》啲同事玩金庸角色扮演,華華相信,除咗「東方不敗」之外,應該係好民主咁,任大家揀囉!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載