› 選擇地區
三藩市
紐約
洛杉磯
其他美國地區
香港 台灣 北美
 
2010年08月09日

做遊戲評判 兩個老友玩埋一份
中環在線:史玉柱幫馬雲搞喪禮 - 李華華

國家要開放,思想要開放,大陸同胞嘅思維,好多時都比我哋香港人豁達,我哋覺得「大吉利是」嘅嘢,佢哋唔介意之餘,仲拎嚟玩餐飽!
好似最近優米網嘅一個遊戲咁,叫參賽者幫其中一個評判籌備喪禮,另一個評判就幫手扮家屬,當日自薦做「先人」嘅評判,就係阿里巴巴(1688)之父馬雲嘞,而扮佢細佬做「家屬」嗰個,就係佢老友─傳奇富豪史玉柱!
咁史玉柱呢個「家屬」諗住點搞「大佬」嘅喪禮呢?據佢向喪禮籌備者(即係個參賽者)提供嘅資料,「大佬」父母喺國外定居,啲仔女亦喺國外讀緊小學,佢「生前」最鍾意打golf同埋上網……咁「大佬」鍾意咩顏色呀?呢條問題終於難到柱哥嘞,搞到佢要即場問番馬雲,「先人」答話自己最鍾意橘黃色喎。
So,喺30秒之內,馬雲個靈堂設計就勾劃咗出嚟嘞─淺色做主調、播平靜和諧嘅音樂、放晒佢「生前」用過嘅高爾夫球棍,仲call埋佢班波友嚟講吓佢嘅軼事㖭!「先人」亦好滿意呢個設計!
如果要醒兩句悼詞畀馬雲又點呢?個參賽者話:「佢係互聯網神話嘅創始者」,而「家屬」柱哥就話:「到另外一個空間去開發阿里巴巴!」柱哥嘅轉數係咪好快呢?

名人時間拍賣 柱哥3粒鐘值190萬

講開柱哥,優米網搞嘅第一個名人時間拍賣─「史玉柱三小時」,競投完畢,最終由陝西瑞德寶爾礦山工程,用189.9999萬人仔投得,3粒鐘嘅對話,亦已經喺上星期四圓滿結束。根據瑞德寶爾個總經理透露,喺3粒鐘入面,佢哋一共問咗柱哥十幾條問題,主要係圍繞公司啲嘢,而嗰百九萬,就會捐去中國人口福利基金會嘅「幸福工程─救助西南地區貧困母親行動」!咁豪咗3粒鐘出嚟為善最樂嘅柱哥,又有咩講呢?佢話「我嘅時間唔值錢,我每日至少要玩10個小時遊戲,少玩3個小時,就可以為公益事業籌到190萬,我非常滿意。」

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載