› 選擇地區
三藩市
紐約
洛杉磯
其他美國地區
香港 台灣 北美
 
2010年09月07日

青心直說:小心「植夢師」 - 胡孟青

電影《潛行凶間》裏面最吸引嘅唔係狄卡比奧,而係荷李活鬼才導演ChristopherNolan,呢位英國仔勝在肯用腦,所以套套都係電影巨片,佢先前嘅傑作有北美票房都大賣5億美元嘅《蝙蝠俠——黑夜之神》,相比馮小剛嘅《唐山大地震》就算最新票房累收6.4億人仔,都仲係小巫見大巫。
荷李活一向係夢工場,創意有價,套《潛行凶間》就索性用夢嚟出發。小偷進入目標人物夢境潛意識中偷嘢,但係小偷亦可以收錢潛入目標人物夢中植入意念,好似好匪夷所思。

不知不覺被大行控制

有心水清嘅行家朋友睇完呢套電影後,有感而發批判大行分析員有如電影中嘅小偷狄卡比奧,懂得化身植夢者,利用報告植入睇好或睇淡某股份嘅前景,驅使當事人因應自己被植入嘅想法按植夢者計劃行動,植夢者成功透過故佈疑陣上下其手,在一場又一場零和遊戲中無往而不利大獲全勝。
大行想你沽埋手上嘅貨畀佢或者想震走你費事賣大包益街坊,會免費用分析報告通知你隻股票死得兼建議你沽之哉,甚至索性調低目標價,其實就係想快啲收乾貨源再踢上去;另一邊廂,咁好心又有大行分析報告上調某股份評級與目標價,甚至叫你快啲上車,因為未來幾十日會跑贏大市,通常報告一出,或者報告未公告天下,股價已行先一步,問題係,你有否諗過點解大行會咁大方,將畀有幾萬美元先至開戶嘅大戶推介免費益街坊,通通都要多得勤力嘅傳媒與發達嘅資訊平台,唔少投資者潛意識不知不覺已經被大行嘅報告言論睇法所控制,正中大行分析師下懷。唔少分析師,在不知不覺間已經蛻變而成「植夢師」,分分鐘就連自己扮演緊邊個都唔知。作為投資者,唔好以為瞓住張蓆夢思懶懶閒閒跟報告可以等運到,隨時走唔切就真係冇仇報。
胡孟青
獨立股評人

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載