› 選擇地區
三藩市
紐約
洛杉磯
其他美國地區
香港 台灣 北美
 
2010年09月10日

敏妮Talk:時令當造國策股 - 溫敏妮

近排經過屋企附近嘅酒樓食肆,已經見到有黃油蟹上市。敏妮唔好海鮮,但就有個勁鍾意食蟹嘅死黨。炒股人提起「蟹」都唔多老利,敏妮之所以提起,只係想講「不時不食」。話說前兩日,有位睇開「港股王」( http://stock.nextmedia.com )嘅經紀朋友講,睇報告王排名榜時,頭幾位分析員好耐都冇update,唔知點跟炒。
大行報告有別於名家貼士,大行分析員唔係個個每日都出報告,咁啱某個sector、某家公司有新聞,或者roadshow見分析員投資者,先有相關報告出,否則要睇分析員會唔會心血來潮、福至心靈做推介。今年行新例,6月底或之後半年結,同12月底或之後年結,要喺兩個月內公佈業績,所以唔少6月半年結嘅公司,逼晒喺8月公佈中期業績,分析員趕住出報告。當你衝完一輪都會唞唞啦,呢個應該可以解釋點解有啲分析員,8月出完報告後,好一陣子冇出報告推介個股。

睇國策王 識得揀股

不過,呢期要搵炒股方向,唔睇報告王轉睇國策王仲有得着。遠嘅唔講,就呢個禮拜,首先係星期一慶祝特區成立30周年嘅深圳,入選成為國務院首批三網融合試點,睇分析創維(751)、TCL(1070)受惠,加上跟手公佈家電下鄉8月銷量大增,呢兩隻股又受惠齊齊升。國務院出咗有關促進企業兼併重組意見,呢個政策令到幾個板塊排隊炒,汽車股未炒完已經炒稀土。
正如股壇前輩話齋,炒股有唔同方法,但係一個方法好難鋪鋪贏,呢期國策推得郁個股,當然係「時令當造」。
順帶一提,最近敏妮Blog上載時有啲問題,噚晚整返先見到唔少朋友問有關5蚊佣經紀,敏妮已經喺Blog度回覆,自己留意嘞!

溫敏妮
http://wanmanli.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載