› 選擇地區
三藩市
紐約
洛杉磯
其他美國地區
香港 台灣 北美
 
2010年09月22日

中環在線:國美內訌 肥了公關 - 李華華

黃光裕(右)及陳曉大戰,三間公關公司反而成為贏家。 設計圖片

國美電器(493)「黃陳鬥」長篇劇應該播到下個星期二(28號)大結局,好話唔好聽,片咗咁耐,結局可能係黃光裕、陳曉同埋小股東全部都係輸家,但惟獨有兩類人反而做咗贏家──公關公司老闆同埋食肆是也!
先講公關公司,但凡呢啲大龍鳳,都係參與各方必備!喺國美呢個case嚟講,國美就搵咗國際級公司Brunswick做打手,呢間公司嘅「強項」係危機處理同埋收得貴,而知名熟客仔代表有李澤楷,真係等閒之輩都唔敢幫襯!
至於黃光裕陣營,就請咗本地薑智策(Corporatelink)護航,至於智策至強係邊一瓣呢?華華估計,應該係「識得黃光裕」!市場傳聞,智策今次幫手收得一啲都唔平,淨係呢單Job,盛惠幾十萬元,值唔值?睇怕只得黃家自己知。

公關戰飯局 食肆都受惠

不過唔知係咪黃家擔心智策太操勞?還是另有打算?華華收到風,黃家已搵多一間公關公司做打手─國際大公司FleishmanHillard。據路邊社消息話,噚日Fleishman已開始做嘢,以「國美公關」名義打咗電話去問下星期二開股東會嘅「戰場」銅鑼灣富豪酒店,話想星期五去睇吓個場;點知俾Brunswick發現咗,結果搞咗幾轉,Fleishman先肯認自己係幫緊黃家手,真係夠晒鬼祟!
查實除咗公關公司肥仔,中環各大酒店同茶樓都係受惠機構,兩邊打公關戰,係咁請記者同股評人食飯,食親都開間大房,是但lock實一個陣營都夠你做喇!

三間公關公司強項

公司名稱:Brunswick
強項:專搞危機處理、收購合併

公司名稱:智策
強項:不詳

公司名稱:Fleishman
強項:手上多國際公司及基金等大客

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載