蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年01月09日

周日名牌
李丞責:一技傍身食唔盡

若要入市,李丞責會選內地商廈,因可以解決租務問題。 設計圖片

螢幕前,他經常「左青龍、右白虎」助人趨吉避凶增財運。螢幕後,他以父親傳授的玄學知識維生。他是玄學家李丞責。俗語有云:「風水佬呃你十年八年」,但應該不會呃自己,為何不靠「專業」知識一注獨贏致富?李丞責說:「賭點可以令人致富?係有例外,但我唔信我係例外。」
記者:陳皓怡 攝影:梁鑑章

李:李丞責 記:記者

記:政府出招,樓市升幅放緩,現在你會否入市?
李:我冇諗過買,因為大市去到2014年有機會見底,明年係小回、小陽春,2014、2015年先去到物極必反嘅階段。
記:如果真的要入市,會選擇哪裏?
李:我會買內地商業樓。國內最難解決租務問題,商業大廈可以解決,因為住宅樓你租咗佢唔交租,仲拆埋你個浴缸走,咁點算?寫字樓租俾商業客,拆走你啲嘢機會好微,而且就算升跌加息都會有租務回報。
記:投資股票又有何策略?
李:我永遠投資股票唔會多過自己條件嘅5至8%。買一隻股票,20萬去到40萬,我會先走咗我嘅成本,然後繼續睇落去,咁即係我係唔係都會贏。如果市道真係唔好,我買20萬,去到28萬我會先走20萬,8萬放喺度,咪當冇發生過。我唔睇圖表,公司背景我都唔識睇,因為係實驗性,唔會輸好多錢。

賭博非為意外之財

記:是否六合彩、賽馬,全部都能夠貼中?
李:六合彩、馬,超過七成半中,十成十就冇,但有樣嘢補救番,就係睇番自己運程得唔得?得,就去到八成半。
記:跟你的貼士便不會輸?
李:好奇怪,(賭仔)聽你嗰隻馬,但佢自己會加多隻落去,結果輸咗。「你畀嗰隻咁冷,我加多隻熱門嘅」,點知熱門嗰隻輸,但我嗰隻係啱嘅、中嘅,所以呢啲就係運。
記:那你豈非賺很多?
李:投資樓,買六合彩、買馬,我唔係為咗一筆意外之財,係想研究呢個計算方法究竟得唔得。我應該身體力行,我都冇做過,點樣話畀你聽。
記:那有何心得?
李:買馬唔會買連贏,獨贏冇我份,彩池超過幾千萬、過億先有興趣,點解唔等個值博率啱啲先?例如3T彩池1億,我又係買500蚊,500萬又係500蚊,我點解要用500蚊去買500萬嘅嘢?

「生活質素唔在於錢」

記:你的專業可以令你致富。
李:我喺澳門做嘢,可以冇賭過一蚊。又譬如我贏過馬,之後3年可以冇賭過馬。一萬個人去賭,可能一萬個都冇賭運,賭邊能夠令人致富?可能係有例外,但我唔相信我係嗰一個例外。
記:你不貪心嗎?財富可以改善生活。
李:錯。生活質素唔在於錢,係心境同精神狀況。你又會話我招積,我家攞住張紙,如果商場唔趕,我踎喺度測字,兩個鐘我可以做得幾多個?一百蚊、兩百蚊、一千蚊、一萬蚊?兩個鐘我就夠維生。
記:怎樣才算夠?
李:我阿爸已經留咗一技畀我傍身,我已經食唔盡。個天唔畀我餓死就算,你攞住一億,可能飲太多酒、食得太多肥膩嘢,血壓高未必係一件好事,其實要睇你個心滿唔滿足。

李丞責簡歷

‧原名李紹唐,現年41歲,父親是高州名風水師李發文
‧19歲投身風水界
‧推出過多本玄學雜誌,包括《傳奇》、《玄機》等
‧曾在報章及雜誌撰文,任電台及電視台主持,客串《行運秘笈》及《豪情》等電影

兔年整體投資策略

跟李丞責做專訪,少不免要問流年運程。
兔代表聆聽,兔年應多聆聽少說話。「狡兔三窟」,明年是找出路的時間,是搵路退的時間,不宜進攻。


南北韓衝突有機會令金價上升,加上美元下跌利好黃金,料黃金走勢可持續到2011至2012年


建材、家具、時裝等走勢不太理想,雖然舊區重建帶出的爭拗較多,但投資物業可留意重建區域


今年大利,尤其交通、旅遊、運輸、修路等行業


二黑星在南位,如電子科技、燃料、飲食股等,波幅大,需謹慎。要留意大型火災、爆炸等事故


今年當旺,保險、醫藥、教育、糧食股等,可看高一線

僅一類凶宅可買

「我係一個睇風水嘅人,我會欣賞一間屋能夠住到人發達。」物業佔李丞責資產四成,他說中國人始終要有瓦遮頭,樓有本身價值,可視為投資工具,同時亦是必需品,「所以我欣賞樓多過股票。」
無論賭馬、買六合彩,抑或投資股票,李丞責都是從玄學角度出發,置業亦一樣,地區、發展商對他來說並不重要,「非常時、非常事,如果實際情況解釋唔到,不妨用多啲角度,用幾千年嘅經驗睇吓。」

09年沽出所持物業

97年頭,他賣出大部份物業,01至03年重新置業,把握了高位沽出,低位買回,但08、09年尾他再將物業賣出,今次的升浪卻要近年才到高潮,「中庸啲講,我09年賣晒啲樓,10年嚟呢個升浪,升多10個percent,我係賺唔到,但跌嘅時候都掂唔到我。」
睇風水目的是趨吉避凶,但凶宅對李丞責來說並無忌諱,「如果唔係風水導致有人死亡,我都會買,但要睇我夠唔夠錢。試過豪宅區有『凶宅』,但我唔夠錢買。」他說,會不時發掘銀主盤和凶宅問題根源,研究當中原因。

做大客毋須多曝光

李丞責三代均是玄學家,父親為高州名師李發文,他14歲隨父登山涉水、尋龍點穴,19歲已成為風水師,但卻因年少得志,面對挑戰,「『你彈開啦,你睇風水點解冇鬍鬚,你幾多歲呀?』你試想,廿幾年前我個樣望落去幾多歲吖?」難聽的說話又豈止於此。
入行沒多久李丞責在夜校教書,遇着都是年紀較大的學生,「我試過幫人睇相時,旁邊嘅人不斷講,『唉,你唔好信呢個o靚仔啦,佢得嘅話發咗達啦!』」這句說話提醒了他,要身體力行去投資,證明給別人看。不過,李丞責並非希望做玄學界第一人,寧願永遠排第四,「槍打出頭鳥,點解要做最好嗰一個,我唔係包尾嗰個咪算囉。」
曝光率早已不低的李丞責,近年經常為電視台拍攝節目,他說:「我人生並唔係為曝光率而生存。真係有錢嘅,我嘅大前輩董慕節、陳伯,搵幾多錢?使乜曝光。真正做大客係唔需要曝光率。」

後記:錯在坦白

採訪當日正值李丞責運程書簽名會,少不了測字環節,一到這些有人歡喜有人愁的環境,說話技巧很重要,李丞責說,人要積口德,「睇得啱同識做人係兩回事。」
有此體會,原因是李丞責朋友曾質疑他,要求他列出10項事件,若當中有1項不對,就請他及早「收山」,年少氣盛的他過份坦白,「第一樣嘢係你屋企個仔唔係你親生。第二樣係你老婆同你離婚嘅原因唔係……,講到第四樣,朋友黑咗面、走咗,其他朋友呆晒。」
風水師見記者,多以「贈幾句」為見面禮,但由訪問開始到結束,李丞責沒有贈小記一兩句,問他為何,他瀟灑地說:「我覺得冇需要。」是的,小記有需要必自行求教,但若丞責師傅與小記有緣,亦不妨多加提點,以便小記六合常中。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載