› 選擇地區
三藩市
紐約
洛杉磯
其他美國地區
香港 台灣 北美
 
2011年03月08日

中環在線:
三八婦女節數三女將 家庭事業內外齊備 - 李華華

梁高美懿

三八婦女節快樂!由古代紮腳、無才便是德,到今日連國家總理都做到,女性嘅地位唔知提升咗幾多倍。生喺香港嘅女性更加係才貌雙全,根據京都天華(GrantThornton)新鮮出爐嘅調查報告,香港企業高級管理層裏面,女性佔35%,全球排名第4!中國都唔弱,女性高管比例係34%,相對其他國家只係得嗰20%,中港女性喺職場上地位真係舉足輕重。今日華華就特別要講三個女性,佢哋都係21世紀嘅表表者,家庭事業兼顧,仲keep得住靚樣,最緊要係心靈同樣富足,唔係單靠外表。

恒生梁高美懿 唔想被稱「女CEO」

「如果當年繼續留在家裏,今天的我會怎樣了?」恒生銀行(011)CEO梁高美懿喺佢嘅CEOBlog話,廿幾年前個女出世,佢放咗5個半月產假,嗰陣有諗過放棄份工全職湊女。結果,經過朝夕餵奶換尿片之後,佢發現做全職媽咪仲難過做行政人員,所以最後決定家庭事業兩兼顧。

攜兩女赴澳洲工作

梁太話,佢好幸運唔係綁住孭帶一邊湊細路一邊車衫嘅女工。85年滙豐調佢去澳洲,佢掙扎一輪之後選擇帶埋兩個女喺身邊,一齊飛去澳洲。雖然唔係綁住孭帶,但人在異鄉仲要兼顧工作同湊女,強成咁,留喺屋企就嘥晒喇!
講真,正如梁太講,女性喺社會嘅角色越嚟越重,要兼顧家庭事業嘅又點只佢。喺恒生家男女員工比例係4比6,董事方面,15席中就有4席係女士。其實,家陣仲邊有話要分男同女,所以佢希望鍾意稱佢係恒生第一個「女CEO」嘅各位,日後就唔好再分「男CEO」同「女CEO」,總之有能者居之。

SOHO中國張欣 自認6年前乞人僧

「巴哈伊改變了我!」SOHO中國(410)首席執行官張欣,年屆45,佢話如果相識喺6年前、即係未夠一支花年齡嘅佢,一定會覺得佢係一個討厭嘅女人。何解?皆因嗰陣嘅佢「不可一世,態度不好」。講得出呢句說話,即係家陣唔同晒啦!

信波斯宗教可改變中國

呢幾年,佢同老公潘石屹搞豪華晚會、着頂級名牌、同名流交往,被稱為明星檔夫婦,但舊年佢喺微博話:「我們太相信物質的豐富,可以帶來教育的提升,最終帶來文明的進步,但中國的發展打破了我們的幻想。」令張欣有所頓悟,都因為宗教信仰,佢話,巴哈伊可以幫到中國,克服物質發展飛速而精神發展滯後的脫節狀態。
巴哈伊到底係邊門邊派?查實係19世紀創建於波斯嘅一個新宗教,全球有600幾萬信徒,教義係相信人類一家,即係無論種族、階級、信仰或者民族,人類通過完善自身可以孕育普世文明。

大新人壽舵手 靚女年齡非秘密

都話「年齡」係女人最大嘅秘密,皆因家陣喺條街度,單憑個樣你好難知道迎面嗰位女士嘅芳齡。就好似噚日大新人壽新CEO周詠姬咁,單睇樣,華華估盡都係三張幾,點知睇一睇佢個簡歷,吓,45歲?

應景搵林欣彤做代言人

不過,21世紀嘅女人,話你知幾歲又如何,最緊要睇落唔似,咁先睇到異性雙眼發光,恨到同性牙癢癢嘛!唔信?噚日華華就聽到唔少女記者行家細細聲話,如果到45歲都keep到周小姐咁嘅質素,真係還得神落。
講開年紀,大新人壽舊年20周年,為咗「應景」,所以搵咗同樣20歲嘅阿Mag林欣彤做代言人。同樣係「應景」之作,大新趁住今日三八婦女節,推出一隻叫「新姿采」危疾保障計劃,目標客戶當然係一眾女士。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載