› 選擇地區
三藩市
紐約
洛杉磯
其他美國地區
香港 台灣 北美
 
2011年03月21日

敦沛劉艷玲:日股見唔到底

敦沛期貨董事總經理劉艷玲斷言日股未有見底迹象。

敦沛期貨董事總經理劉艷玲做咗日本期貨超過20年,對於今次日本地震並引發核輻射危機,佢話無論係日本股市抑或期貨市場,都出現恐慌,家陣根本見唔到底!

博日股反彈 不如押注中國

佢仲話,呢次日本發生千年一遇嘅地震,無論期貨市場同股市都冇方向,日本期貨市場雖然3度跌停,但投資者心理上都唔夠膽撈底,所以佢斷言日股未有見底迹象。
核輻射危機越演越烈,加上跌市成交大增,反映投資者信心脆弱,就算日本央行連番注資,但短期成效成疑。以當地經濟狀況嚟睇,佢話家陣估值未夠吸引,未係撈底時候。
不過,日股跌,對於打工仔嚟講,係咪趁低將強積金轉去日股基金嘅時機呢?劉艷玲認為博唔過。佢笑住話:「好多人5年前已經落注博日股反彈,但到家都未有斬獲!」對於將近退休嘅人,佢認為應該以穩健行先,可以買債券基金收息;咁年輕人呢?
係就係可以博,但佢就寧願押注中國,而唔係日本,因為日本人有錢,有錢人又點會博呢,所以經濟增長空間點都唔及中國同印度呢啲新興市場,中國人雖然有部份已經富起嚟,但仲有唔少窮人,人窮先至肯博嘛,所以應該買中國基金。
單就市況嘅震撼程度,佢就認為唔及89年民運,原因係當時北京戒嚴,投資者搶購商品,搞到商品價大升,「六四後周一開市,日本連升3日至升停板,當時嘅投資者唔考慮合唔合理。」咁又係,佢做期貨,當年個市升到失理性,佢當然印象深刻啦!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載