› 選擇地區
三藩市
紐約
洛杉磯
其他美國地區
香港 台灣 北美
 
2011年03月21日

敏妮Talk:短暫驚喜 - 溫敏妮

香港揚名國際!不過,相信唔少香港人都同敏妮一樣,唔覺得光榮,反而覺得丟架,以「盲搶鹽」名聞海外,失禮!
有人大鬧商人發災難財,坐地起價,但市場有求就有供;何況,換另一個角度睇,幾蚊嘅鹽賣到幾十蚊,唔係提醒咗你喺入貨前諗一諗,好唔好高追咩?
敏妮都係香港一分子,所以香港人「爆」嘅事唔好多提,反而敏妮想講一隻股票。

「碘股」炒5分鐘已見頂

上個禮拜四晚,遠大醫藥(512)發表自願性公告,話旗下附屬武漢遠大,喺中國擁有碘化鉀藥品(片劑)生產批文嘅少數醫藥企業之一,而且最近已經接到有關碘化鉀產品需求查詢,並進入生產準備狀態。喺「碘片」可以抗輻射嘅前提下,遠大醫藥「自願」道出有碘賣,文雅啲講「司馬昭之心路人皆知」。
敏妮將呢個公告forward俾Mr.B,點知佢話,敏妮叫買,似乎係想害佢,都係送兩包鹽畀佢實際啲喎!當時敏妮唔敢講有碘賣呢個消息,會唔會令隻股升,只係諗住有「好嘢」公諸同好。
隻股發出自願性公告嗰日收市報6毫,翌日競價時段高見7毫,結果以6毫4開出,開市5分鐘內見全日高位6毫9。早起身喺競價時段或者開市買入,跟手順便掛高幾格沽貨,先至有錢賺,否則即日鮮頂多都係打個和兼輸使費,磨爛蓆者睇嚟就凶多吉少。
敏妮冇話想跣Mr.B,因為敏妮相信呢啲自吹自擂股都會提供短暫「驚喜」畀投機者,但就唔好有太多幻想。

溫敏妮
http://wanmanli.com/blogs/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載