› 選擇地區
三藩市
紐約
洛杉磯
其他美國地區
香港 台灣 北美
 
2011年04月12日

600嘉賓撐金利豐
李小加幫手打鼓

如果金魚缸搞個最有影響力嘅排名榜,金利豐(1031)老闆娘朱李月華一定入三甲。金利豐早前借殼上市,最近完成收購金利豐證券、期貨、財務顧問同資產管理,為咗隆重其事,喺中環四季酒店大搞慶祝酒會,到場嘉賓人數大大話話有500至600人,簡直係商賈雲集,足見朱太喺圈內有幾多老友記,如果朱太出嚟選立法會議員,贏面應該好高㖭!
金利豐今次唔係大鑼,都要大鼓咁搞大佢,朱生(中)、朱太(左二)同幾位嘉賓打晒鼓,夠晒象徵意義。企喺朱太隔籬嘅港交所(388)行政總裁李小加(左一)亦打得相當起勁,朱生、朱太更加係吓吓有力!朱太話,平保(2318)旗下平安人壽同西京入股之後,金利豐亦可能繼續引入新投資者,平安人壽睇得金利豐好緊先決定入股,有晒品質保證咁話。

賭業及娛樂大亨雲集

呢個一字排陣容,集合咗港澳娛樂及賭業大亨。賭王爭產事件告一段落,四太梁安琪(右三)神采飛揚,夾埋老臣子蘇樹輝(左一)一齊賀朱太呢位金蘭姊妹。寰亞電影老闆林建岳(左二)仲從廣州回港出席酒會。右四為朱太父親李惠文。

彤叔酒會開始已現身

新世界發展(017)主席鄭裕彤噚日喺酒會開始無耐就出現,以佢嘅資歷,認真畀面朱太。大家見到彤叔,自然問吓佢周大福珠寶嘅上市大計搞成點,佢承認係搞緊,但應該唔會喺今年上市。

覃輝專程搭飛機到賀

星美(198)大股東覃輝(右)為人極之低調,平時好少公開露面,之不過星美曾經搵過金利豐批股,佢同朱太話晒都叫做有生意來往,難怪覃輝要專程搭飛機返來賀一賀朱太,話唔定兩人再有合作大計呢!

毛玉萍劉央雞啄唔斷

澳門賽馬會董事總經理李志強之前嫁女,毛玉萍(右)都有畀面出席,估唔到佢同朱太都有交情,又可以同西京投資主席劉央(左)雞啄唔斷,唔知係咪問劉央點解會入股金利豐呢?

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載