› 選擇地區
三藩市
紐約
洛杉磯
其他美國地區
香港 台灣 北美
 
2011年10月13日

中環在線:小小超身份證變硬銷道具 - 李華華

身份證上面有好多重要資料,但小小超為咗令股東釋疑,不惜公開畀大家睇。程志遠攝

電盈(008)噚日開股東特別大會,表決分拆電訊業務上市嘅議案。雖然話數票,小小超李澤楷應該坐定粒六,但面對小股東質疑,分拆咗電訊業務之後,電盈仲剩返啲乜?鑽石級「筍盤」小小超,繼續展現親民作風,不惜以自己嘅身份證做例子,話畀你聽,無論係佢嘅,定係你同我嗰張智能身份證,都係電盈出品。
話說電盈分拆電訊業務後唔係剩返吉殼一隻,仲有now寬頻電視同企業方案業務。now唔使多講,企業方案業務就唔係咁多人知做乜?

相關新聞:中環在線:事隔4月 股東變面

唔放銀包放西裝袋

小小超話,其實呢個業務有好多生意,舊年生意額超過廿億。冷不防佢仲拎自己張身份證出嚟話,「我哋香港嘅智能身份證就係好例子,係電盈從頭到尾一手包辦嘅項目。由智能身份證裏面嘅晶片,個人資料嘅注入,到你哋喺香港出境入境時,測試指模嘅入口機,到所有政府入面智能身份證儲藏,同運輸、分析、驗證、保安,都係電訊盈科商業企業方案服務包辦。」
一氣呵成,應該早有預備,但相信大家焦點都唔係小小超嘅台詞,而係佢張ID,華華企得遠,只係隱約見到身份證上嘅小小超係平頭裝。一般人身份證會放喺銀包,但小小超就放喺西裝側邊(左邊)嘅袋。唔知係咪一早預備show畀大家睇,所以放喺個方便攞嘅地方呢。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載