› 選擇地區
三藩市
紐約
洛杉磯
其他美國地區
香港 台灣 北美
 
2011年10月13日

中門大開:心底話 - 添馬男

如振英哥仲以為同煲呔保持距離有着數,將是另一政治判斷失誤。

煲呔份施政報告叫做「繼往開來」,主題似競選多過卸任,睇怕阿爺早有兩手準備,叫佢幫手睇場,為下任Set好重大政策框架,以免新任特首好似老董大頭症發作,亂搞一通。今次睇吓邊個候選人有慧根,摸到阿爺心意,如果振英哥仲係以為同煲呔保持距離有着數,又係另一政治判斷失誤。唐唐反而識得緊貼中央,冇同煲呔切割。
今次施政報告好長,讀嘅辛苦、聽嘅都辛苦。三大瓣政策算交到貨,有糖派有政策,事前預告煲呔有心底話講,主要係最後兩章。今次擺明反對福利主義,亦暗中反對經濟規劃,駁斥乜嘢深層次轉型矛盾,但佢最重要總結係最後有關行政改革一段,大部份傳媒、政客都會Get唔到,只有AO先明白佢想點,聽完大家都你眼望我眼,心諗:「唔係呀嘛?」
煲呔認為要配合普選發展,政府內部財政、土地資源分配方式要改變,但就冇明言應點改,出咗題就等下任候選人作答。現時內部資源分配,仍按殖民地由下而上方式,政策局提出政策,然後向庫務局申請攞錢,但就冇人保證一定成功過關,好多社會大眾、議員、政黨政策要求就係卡在庫務局,背後即使局長支持、甚至特首支持,都敵唔過庫務局長。土地一樣,地政署揸死晒,出邊好多團體想要地做公益、文康體育必定冇行,而一刀切補地價政策亦完全冇彈性。

「行政改革」難見成效

問責制及普選特首,令推動政策變成由上而下,「內閣」先係決策中心,特首又有選舉政綱要做,佢哋要向市民同議會負責,點可能由庫務地政等政務官揸住要害。前祖家英國深知官僚僵化禍害,二十年來打破鐵飯碗,即使高級公務員待遇也要同表現掛鈎,相關閣員大臣也有Say。
惟獨是特區,回歸後之董陳政爭,以八卦人事矛盾定性,睇唔到制度上問責制與行政主導之間矛盾。擺個公務員出身嘅煲呔上去以為就搞掂,結果係佢都冇計。最後卸任前才提出「行政改革」,可惜,街邊幾位熱門人選,冇一個似有魄力去移動官僚體制。
英國係由保守黨鐵娘子一直改,改到工黨貝理雅、白高敦,再到保守黨金馬倫執政,廿多年間不計政黨分歧,全力改革官僚體制,先有成效。特區領導又何來政治能量、視野同執行力。其實,一日決策仍由官僚主導,特首姓唐姓梁又有乜分別呢?
添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載