蘋果日報 | APPLE DAILY
› 選擇地區
三藩市
紐約
洛杉磯
其他美國地區
2011年12月19日
馬上成為壹會員

投資的天空:大市欠方向 炒友最無奈 - 張士佳

半個月過去,指數幾乎原地踏步,似乎咩事都無發生過,但實際上評級機構與國家/央行們你一拳,我一腳,煞是精采,評級機構突然下調大型銀行評級,央行們見狀,立刻夾埋一齊救市。
評級機構亦唔示弱,話要將歐元區15個國家列入負面觀察名單,於是歐盟峯會中除了英國外,其他國家都願意組成更緊密財政聯盟,顯示合作的決心。
評級機構咬着唔放,話成果無法令人滿意,明年第一季仍要檢討各國評級,加上市場上對於銀行及歐豬國的短期融資問題仍存有疑問,結果兩股勢力拉扯之下,指數升完又回吐,了無寸進。
在兩方角力的情況下,最無奈的自然是缸湖中人,以自己為例,一手淡倉,見到央行勢兇夾狼,也被呃走了一截,但唔好以為只得淡友無奈,好友見國家們出手,心諗評級機構點夠打,之後都係大漲小回之局,毋須急於食糊,點知在高位吽吓吽吓,突然間又跌回挾升前位置,又怨自己今趟真係「有食唔食,罪大惡極」。
純以外圍因素來看,兩方角力在短時間都唔會停止,所以如之前所說,短期個市都會欠缺方向,上吓落吓,對港股投資者而言,或者更關心的是內地會否放水及救市,就像上周五般,港股午市便因內地傳再減存款準備金率而跟隨A股抽上。

倘再減準備金有隱憂

執筆時存款準備金率未降,不過,如果真係再減,筆者頗擔心內地究竟發生何事。上次仲可以話係呼應六大央行救市行動,但如今次傳聞屬實,似乎歐債的火真的燒到上大人身上,要快速撲火。
當然,有人會話這是中央開始放水的訊號,其實是好事,但通脹剛剛才回落,明年又到換屆時,寄望上大人如08年般再大開水喉似乎不切實際,可以說此刻內地應該是「Nonewsisgoodnews」。

張士佳
寶來證券(香港)資產管理部董事
本欄逢周一、三、五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載