› 選擇地區
三藩市
紐約
洛杉磯
其他美國地區
香港 台灣 北美
 
2011年12月19日

中環在線:黃錦康出盡風頭
太極王馬場劈大石 - 李華華

上星期六,沙田馬場舉行美聯賽馬日,美聯(1200)主席黃建業理應係風頭躉,但嗰日佢嘅風頭畀副主席黃錦康(Albert)搶晒!
Albert話喺職場打拼,最緊要醒目,仲要周身刀張張利。話口未完佢即刻吳剛師傅上身,即場表演「徒手劈大石」。據聞佢練劈大石只係練咗一個月,果然功力深厚。

趙世曾嘆股市難睇

只見Albert手起掌落,嚿石就斷開兩截,堅過石堅!原來佢15年前,花成十萬銀請北京武術大師學太極,「我隨時隨地都喺度練功,好似啲下屬唔生性,發火時拍枱,瞓覺前都可以練,因為瞓喺度丹田都郁緊,唔會嘈到老婆,練完一遍就瞓到覺,慳番啲時間數綿羊。」
佢話練功過程好寂寞,好似好多年前學睇市,冇人信佢分析,太極都要忍受呢個漫長過程,「最緊要練好中正(基本功),好似三腳架都要三隻腳先企得穩,劈石技巧就係喺0.1秒用你個身嘅力壓落去。」Albert話,都會練到手痛,要返屋企捽跌打酒㗎。咁博,唔怪得老細甘願被搶風頭。

個個基金經理都做緊年結,華華喺馬場見到趙世曾,問佢點睇近排市況,佢話今年表現都算可以,「我始終覺得香港一定有人會買樓,如果每年有兩、三萬個單位供應,啲人就算今年唔買下年都會買。」咁股市呢?趙生就擰晒頭,「股市好難睇,個市上上落落,惟有睇遠啲,兩年後去到兩萬點應該冇問題。」
至於摩王黎汝遠對樓市就冇咁樂觀,寧願揸多啲cash,「好似賭馬咁,唔使次次都落場,只要落一、兩場得就得,睇樓都係一樣。」好似佢隻愛駒「天外之天」咁,今季首場出戰,上次跑第三,今次跑第二,留力都好重要。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載