› 選擇地區
三藩市
紐約
洛杉磯
其他美國地區
香港 台灣 北美
 
2012年01月09日

智取大市:創科成美經濟陰晴計 - 晉佳

歐元急跌,港股作為國際資金嘅提款機,往往表現較外圍更差,亦令近期受中美股市影響程度減少。睇期指上星期五嘅走勢同交投,淡靜市況應已完結,嚟緊又再Chok番,但即月期指喺10點15分後幾分鐘出現過大陰燭,成交合約超過3600張,反映淡友先行發力,算係略為利淡。
雖然各界已為歐債高峯期做咗防洪準備,預咗問題會惡化,但係歐洲有乜依郁,班資回朝難免,到時又係搵着港股嚟搞。就算首季環球股市唔跌,港股都係跑輸居多。股市受政治因素左右嘅話,任何預測命中率都會減低,似賭博多過投資,要贏錢,就講值博率多過機會率,如果距離止蝕位極近,最佳策略係輸小博大贏。所以上星期五晉佳講過,可以喺恒指略低於100日線之下造淡。
歐債消息已消化咗唔少,內地A股大家預咗佢半生不死,其他負面因素,第一個係地緣政治風險,例如伊朗打到埋身,但冇得預測嘅因素就唔諗住。另一個可能就係美國經濟「死貓彈」確認完成,帶領全球陷入衰退。
近期聯儲局官員話12月仍爭拗緊使唔使進一步放寬貸幣政策,就知大家對經濟又冇番信心,一改8月時奧巴馬、伯老拍晒心口話經濟冇問題口風。嚟緊美國經濟似乎開始又唔OK,如果冇QE3憧憬頂住,美股強勢可能止步。

美股強勢隨時止步

要預測美國經濟,可以望吓美國概念股走勢,其中利豐(494)、創科實業(669)及德昌電機(179)近期股價算硬淨。創科啱啱突破咗頭肩底頸線約8蚊水平,本應利好,最近回落返去頸線,仲可以當係後抽,但如果港股繼續向下,拖累創科明顯跌穿頸線,連呢隻強勢股都收皮,港股就好難有運行。
晉佳估計,美國經濟回落機會較大,所以上述股份跑贏大市嘅走勢短期內可能結束。創科喺美國概念股當中較好嘅一隻,產品開發能力出眾,新產品受歡迎,成功抵禦美國樓市低潮,保持增長,預測2011年市盈率10.3倍亦唔算貴。如果見股價明顯跌穿8蚊嘅頸線,確認頭肩底利好形態失效,可止蝕離場,但只要一直守住7.80至8蚊水平,就唔使沽住,中線睇11蚊。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載