› 選擇地區
三藩市
紐約
洛杉磯
其他美國地區
香港 台灣 北美
 
2012年01月09日

中門大開:政治慾蒲團 - 添馬男

最近唔少親CY媒體不約而同力挺今次自己人內訌,認為有競爭才有進步,候選人更貼民情,中央擺脫欽點指摘,又成功將泛民邊緣化云云,講到中央畀振英入閘直頭係天大德政。塘邊鶴如此賣力打鑼打鼓,睇怕農曆新年前中央政治局常委將正式拍板,睇個勢收網機會好大,振英大有可能龍年止步,原本以為飛龍在天,最後變成龍游淺水。

委任未必衰過小圈子

「競爭有益論」表面言之成理,但只要稍有政治常識諗深一層,就知係小學雞Spin北京領導的低能論據。我認為假競爭比真欽點更壞十倍,咪以為委任一定比小圈子衰,以過去殖民地立法局為例,你話功能組別議員係咪一定比委任好?未必。
今日香港政治最大矛盾是既得利益階層坐大,靠拖慢民主化保障小圈子利益,你問立法會醫學界功能議員,點解醫學界咁可恥,為專業利益奉行保護主義,阻止外國專家來港工作,置公眾利益不顧?答案一字咁淺,佢當然以狹隘界別利益為先。
港督以往靠委任議員保駕護航,係毋須以任何政策利益作交換,政府才有絕對自主性。今次特首選舉內閧並非真競爭,你見泛民兩條蛋散邊有人理。所謂建制內競爭,即係爭逐1200個類似立法會功能組別方式產生的委員支持,這將成為赤裸裸小圈子利益交易。兩個月來所謂競選,就只係向選委拜票,選委向候選人落單,候選人唯唯諾諾,睇到眼寃。都係鄭耀棠最老實,公開同記者講工聯會越遲決定支持邊個,對自己越有利。可見他們選擇之標準係誰可提供最大利益,所謂建制內競爭是將功能組別之惡菌種入行政機關之中。特首未上場已欠下周身政治債,施政又何來自主性,更甚者係不少民粹政綱會同日後政務官集團產生矛盾,政爭將無日無之。

特首未上任已周身債

當日北京欽點煲呔,何曾見過建制派政黨如此張揚跋扈,只因北京下令全力支持煲呔,共抗泛民傑哥。煲呔才得到政治空間,提出施政綱領,組成政務官內閣執行。今日所謂競爭,巿民關心普選、廿三條立法,兩人避得就避,振英更以操弄本土與內地族群矛盾議題走民粹之路,標籤內地孕婦及來港投資物業內地人士,如此招式,澳洲漢森及法國勒龐等右翼政客十多年前已用過,陳水扁也曾玩得出神入化樂此不疲。兩月來之爭逐又何曾貼近過民意呢?
當年北京批老董議而不決,決而不行,並非老董性格有問題,而係連任之時欠落周街政治債,施政動彈不得、人人有求,到腳痛落台債都未還晒,真慘情!
「競爭有益論」只係一套3D肉蒲團,用女優意淫加特技引鹹濕仔入場,睇睇吓才覺唔對路,最後才知係重口味暴力片,但後悔已太遲。小圈子特首競爭上崗,何嘗不是對民主的意淫,一時不察,必定中招。
添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載