› 選擇地區
三藩市
紐約
洛杉磯
其他美國地區
香港 台灣 北美
 
2012年01月13日

中環在線:黃浩還擊細莊 - 李華華

黃浩娶咗咪神徐淑敏之後,知名度大增。

唔開名爆名人秘密嘅專欄多的是,寫呢啲欄好講功力,令看官估到與估唔到之間,而又告你唔到吹你唔脹,先為之好武功,功力唔夠,分分鐘會俾人告誹謗。
《蘋果》有個專欄前排講「翻版楊其龍」,華華睇完,不禁要打畀飲食界才子黃浩(Kenny)問過明白。
專欄作者「細莊」大意是咁的:「翻版楊其龍」間花雕雞舖頭賣埋海鮮不倫不類,又話佢搵到大水喉射住,好豪咁喺老蘭搞Club同超豪日本菜,但因為唔係自己出錢,所以掛住溝女唔理生意,搞到間Club執笠嗰陣連酒牌都未攞到,最後仲寸多句話佢老婆咁快就出番嚟搵奶粉錢云云。
Kenny話,首先,成個香港都知佢花名係「翻版楊其龍」,第二,花雕雞全港係佢獨家經營,第三,一口氣喺中環開Club同高級日本菜,又係得佢一個,所以,佢本人同身邊嘅親朋戚友,全部都知道嗰篇嘢係話緊佢。
Kenny話,用個腦諗吓都知,成個香港冇人可以喺中環打開門口賣酒畀高官名人而竟然夠膽唔攞酒牌,若然佢真係可以無牌賣酒一年幾,香港都無法無天啦!而「無牌賣酒」呢單嘢,令佢俾各界好友「查詢」同嘲笑咗成個月。
至於話花雕雞點解賣埋海鮮,佢話係台灣partner(一品花雕雞創辦人蔡啟漢)嘅idea,因為台灣嗰邊冇辦法整到魚缸養海鮮,所以佢哋特登使廿幾萬整個大魚缸畀客人多個選擇,勢估唔到俾人話不倫不類囉。
Kenny話明白娶咗個藝人做太太,自己都成為公眾人物,所以一直訓練自己EQ要高啲,但唔係事實嘅嘢,佢一定唔會任人亂寫,因為作為一個生意人,最重要係信譽。《蘋果》咁多人睇,所以佢希望華華幫手還佢一個清白……
樹唔大唔招風,蛋散先不招人妒,Kenny,睇開啲啦!

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載