蘋果日報 | APPLE DAILY
› 選擇地區
三藩市
紐約
洛杉磯
其他美國地區
2012年02月15日

金融人語: A貨亞洲股神搞草根超市

4,074
李超人旗下的百佳被批評以低成本傾銷。

本地地產商為求賺盡每一毫子,都會沾手超市生意。我哋收到風,一位與李超人同樣級數嘅富豪,最近都有興趣加入超市戰團,但佢一心搞的是專門為草根階層而設嘅平價超市,以貼近成本價畀基層買必需品。

大公子揸旗 首站深水埗

呢位富豪同超人,同樣係本地上市地產商龍頭之一,其上市公司業務包括酒店、建築、公用事業等等,喺07、08年更一度被傳媒吹捧為亞洲股神,每每為港股作出預測,佢本人則謙稱自己只是 A貨。據我哋所知,富豪嘅大公子負責呢個 Project,喺目前地產霸權的濃厚氣氛之下,相信佢哋想借草根超市提升上市公司的形象,在企業社會責任上攞分。
我哋聽到,富豪初步計劃係喺一些比較多低下層的地方,例如係舊區、或者新市鎮,如深水埗及天水圍等地方搞草根超市。由於富豪嘅上市公司近年喺深水埗收購唔少地舖等物業,我哋估計,佢第一個超市會係深水埗旗下物業開張,以免租方式營運。慳番租金的草根超市,產品自然平得多。
佢哋現時忙於前期籌備工作,要解決一些執行上的問題,初步打算用類似會員卡方式核實基層身份。避免有人低價買入貨品之後轉售圖利,希望呢個「草根超市計劃,真正幫到有需要人士,唔使捱超市嘅貴價日用品。

李超人超市成眾矢之的

A貨亞洲股神首度涉足超市業務,存心想減輕草根的通脹之苦,但消息仍然相當敏感,隨時會觸動兩大超市的神經,雖然和黃(013)大班霍建寧曾說過,百佳都係慈善事業。
原來2003年時,百佳曾被外界質疑部份貨品定價過高,當時主席李嘉誠話,百佳02、03年盈利少過營業額的2%,賣100元貨,只賺不足2%,「而且超市任何人都可以開,啲人都唔理性分析事情。」霍大班更話當百佳係善事:「百佳邊際利潤不足1.5%,是食之無肉的雞肋,舖頭越來越靚,又有冷氣。兼地方整潔,經營下去猶如做善事。」

Margin雖低 現金流強勁

既然 Margin咁低,咁點解仲要做呢?超人自然無提及零售業務,係一盤現金流強勁嘅穩定生意,而且做善事都要向股東交代嘅,所以和黃零售業務舊年上半年的除息稅前盈利仍達到36億元。
若說百佳是慈善事業,外界顯然感受不到,百佳及惠康兩大超市,前幾個月便因為代理禁售可樂事件,一度成為眾矢之的。他們被指借市場大佬嘅優勢,向供應商施壓,唔畀阿信屋賣平過建議定價嘅可樂,之後豬肉商又指百佳利用市場優勢,把豬肉以低於成本價傾銷,趕絕市場的中小型競爭者。
家陣 A貨亞洲股神加入這個是非之地,相信規模一時唔會好大,但唔多唔少對百佳呢盤「善事」有影響。

地產商兼營超市成行成市

除咗超人喺香港搞百佳外,香港大部份講得出名的百貨超市,崇光、 City'Super、一田,背後老闆都係大地產商。

彤叔大劉吳光正皆有染指

好似利福(1212)旗下位於銅鑼灣、尖沙嘴旺區崇光超市,背後嘅大股東分別係新世界(017)主席彤叔及華置(127)主席劉鑾雄。九倉(004)主席吳光正私人都持有超市 City'Super的四成股權,04年零售市況低迷嘅時間,吳光正通過當時私有化無耐嘅連卡佛,用大約1500萬元買入九倉手上的 City'Super呢四成股權,當時交易價近25倍 PE,但相信到家下應該升值咗唔少。
90年代初進駐沙田新城市廣場的日本西田百貨,05年有意退出香港市場。睇中自由行商機嘅新地(016),當時就以6500萬買斷西田商場,為罕有由業主買起租戶嘅交易。之後西田百貨易名一田,新地之後亦索性利用呢個自家品牌擴充零售業務,分別進駐旗下新蒲崗商場 Mikiki同大埔超級城。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載