› 選擇地區
三藩市
紐約
洛杉磯
其他美國地區
香港 台灣 北美
 
2012年03月01日

金手指:歐央行印完股市點走? - 孫柏文

就算經過歐洲央行兩輪LTRO,希臘仲係完全冇錢,仲係等緊人打救。法新社

噚日,歐央行宣佈第二批、即聲稱係最後一批嘅三年期1厘LTRO貸款有幾多人申請。結果?有800間銀行,借咗超過5000億歐元。銀碼同上次差唔多,但上次只得500幾間銀行申請。
點都好,孫柏文相信市場現階段似舊年花旗國聯儲局「量化寬鬆QE2」末段。QE2喺2010年尾正式開動,到2011年4月結束,股市喺QE2宣佈後不過落實前嘅幾個月大升。落實初期已見頂,之後有波幅下橫行至4月完結時,跟住恒指就由24000點喺5個月之內跌穿16000點。

白銀勁升股市玩完

即係如果歷史重演,班央行組成嘅紙幣狂魔集團暫時停止印鈔,股市已升完。而今次LTRO似QE2嘅另一現象,就係我至喜愛、不過又係每個浪中嘅藍燈籠白銀都有大升勢。我同一眾白銀戰隊成員,每見白銀開始勁升,就會開始預期呢次全球資產升浪完結在即。
今次歐央行行動有冇幫助,我只可話有啲有有啲冇。先講有用,最受惠之國必定係意大利。因為佢哋之前嘅政府財政,如果撇開國債利息開支,其實係有盈餘。即只要利息開支夠低,其實係可以過關。咁因為之前香港輸出全球至勁嘅政治制度畀佢哋用(總理,即行政長官唔係選出來。內閣,即局長們唔係選出來,不過係「精英Technocrat」。國會,即立法會,審理班「精英」拋出來嘅方案後,因受到歐盟布魯塞爾,即北來中央嘅壓力,橡皮圖章般通過),令市場覺得意大利香港化後,可推動艱辛嘅改革。
不過其他國家,就冇咁有用。先講希臘,就算經過兩輪LTRO,佢哋仲係完全冇錢,仲係等緊人打救。隔離版利世民都講過話畀希臘嘅錢,希臘政府冇得過水濕腳,直接攞來還錢。公務員唔係減薪三幾個百分點咁簡單,而係要嘔番錢畀政府。而每次長期患病嘅死亡徵兆,又已出現。
呢啲臨死徵兆,就係國家系統嘅供應商,拒絕再供應。例如舊年希臘煉油廠只得15%原油來自伊朗,到今年初就去到超過80%,不過早幾日,伊朗話因歐盟抵制佢,所以唔出口原油畀希臘。抵咩制呀,根本就係伊朗供油畀希臘要畀數期佢,不過你依家揸住希臘政府嘅Receivables去銀行借錢,銀行都叫你走開啦。咁點賣油畀佢呀?
仲有,藥廠都停止供藥畀希臘。如果你係啲典型唔做功課嘅80、90後道德超人,千祁唔好鬧住,因為藥廠咁做,係因為供藥畀佢時,不但唔找數,仲要有關人士攞啲藥離開希臘,賣出國。

德國救希臘屬假象

德國話通過畀錢希臘,全是假象。因為德國好似啲英國大學咁對希臘呢個申請人。特區JUPAS,就係你先報大學,跟住考試放榜後,大學要你就出鐵一般Offer。花旗國係考晒試,先報大學,之後大學要你都係出鐵一般Offer。英國就你申請,佢出個有條件offer,例如要你考到某個成績,你之後考到先收你。
依家德國國會幾百票對幾十票通過救希臘Offer,考到六支A就救佢。希臘答,不過我只係考四科,市場淨係見德國國會嘅Offer,就已開心一陣,唔拋空真係對唔住自己。唯一問題係,近排,越沽越被挾。點搞?

孫柏文
獨立股評人
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載