› 選擇地區
三藩市
紐約
洛杉磯
其他美國地區
香港 台灣 北美
 
2012年03月01日

中環在線:十個華爾街才俊一個癲 - 李華華

要喺華爾街打滾兼青出於藍,除咗要夠醒目,天生異稟先可以突圍而出,話明「異稟」即係同正常人有唔同啦!最近就有報道指,十個華爾街員工中,有一個就有精神病嘅病理特徵,一般人口嚟講,比率只有1%,即係喺華爾街打工嘅人,癡線嘅機會係一成。華華都識得唔小中環「ibanker」,咁咪好危險囉?
呢個調查亦令華華諗起十幾年前,有套戲叫做《美色殺人狂》(AmericanPsycho),內容講有個年輕華爾街才俊,原來私底下係個變態連環殺手,殺人唔眨眼。男主角就係蝙蝠俠基斯頓比爾(ChristianBale),套戲陰沉到令人差啲瞓唔着。

表面正常合群

聽聞呢啲癡線佬上至CEO等高層,下至普通職員,平時都會將陰暗嘅一面收埋,表面正正常常,又合群,面面俱圓,仲好有魅力㖭;不過事實上佢哋成日會講大話,對人冇乜同情心。
再者,佢哋承受風險嘅程度好高,因為佢哋唔知個後果係點,或者根本唔在意有乜嘢後果。都唔難明嘅,喺華爾街大行做嘢,就係要講個「搏」字,啲交易員就係以高風險搏高回報囉,啱晒啲癡線佬。其實有測試證實,部份交易員愛冒險,程度仲高過啲精神病人。
華爾街交投頻繁,工作環境壓力大,對員工嘅精神健康都好有影響。最近有研究指,好多年輕銀行職員,做幾年就有酗酒、失眠、飲食失調,或者其他因壓力而引致嘅病症。證券經紀患抑鬱症嘅機會率,較一般人高三倍。唉,雖然係賺到錢,不過搞成咁又有乜用呢?

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載