› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

智取大市:有望翻生李寧未升夠 - 晉佳

近期衰股走勢強,好多人都覺得冇理由,但有時炒股係睇你轉得幾快,有啲衰股估值喺低位已經反映咗失敗,只要肯嘗試重整旗鼓,估值就「有機會鹹魚翻生」。簡單地假設,思捷(330)鹹魚翻生嘅機會率係30%,長遠股價就有機會去番60元,如果70%機會失敗就等俾人收購,每股只值個位數,可能係5元。要計估值,就用60元乘以30%,加上5元乘以70%,等於21.50元,咁計法前收市價19.26元就變得有道理,反正一味認為佢只值個位數,亦唔見得理智。
另一隻衰股李寧(2331)又點呢?佢1月份獲私募基金TPG同新加坡GIC買入7.5億元人民幣嘅可換股債券,行使價7.74元,當然,要成功翻生先會換股,失敗就轉售李寧俾同業套現還債。1月中起,港股暢旺,TPG咁多股唔買而押注李寧,應有一定把握。TPG作為零售股醫生往績唔錯,09年投資達芙妮(210)同物美(1025),當時大家都唔多睇好,又俾佢搞掂,股價跑贏大市,達芙妮仲入埋MSCI指數。
咁李寧有冇得救?佢舊年收入按年跌6至7%,純利率跌7至8個百分點,簡單計純利最多跌7成,最差係市盈率達25倍,TPG可能睇中佢管理差,有改善空間。李寧今年承諾做一系列措施,包括降低日常費用同提高效率,調整產品結構,控制採購成本,加強二至四線市場零售效率,清理零售庫存,加快現金周轉。喺TPG同GIC監察之下,睇怕李寧都唔敢怠慢,至少可令純利率顯著回升,純利反彈指日可待。

短線睇10.9元

不過,長遠關鍵係銷量能否回升。李寧內地主要競爭對手係Nike,但更啱比較係中字派嘅安踏(2020)等等,如果李寧管理得好啲,加上喺設計、品牌、宣傳、整理二至四線分銷渠道有改善,莫講話同安踏鬥,仲有機會反敗為勝,至少冇思捷面對強勁對手H&M咁痛苦,翻生機會似乎較高。
目前李寧預測市盈率非常難估,最好用規模嚟計估值。李寧市值只及安踏一半,大有條件力追,就算安踏打橫行,李寧中線依然有機會上番阻力13元,短線可睇舊年9月高位10.90元。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載