› 選擇地區
三藩市
紐約
洛杉磯
其他美國地區
香港 台灣 北美
 
2012年03月05日

中環在線:滙控CEO要拆自己招牌 - 李華華

設計圖片及對白

一個廣告嘅口號若果改得好,十年後大家仍琅琅上口,勝過花大筆錢落廣告,獅子行喺香港屹立咗咁多年,都有一兩句耳熟能詳嘅口號,好似「儲蓄滙豐,滿足心中」咁,唔記得嘅話,近期嘅「World'sLocalBank」(環球金融,地方智慧)應該記得喇啩,不過呢個宣傳口號,行政總裁歐智華就話唔多掂,舊年滙控策略日提出連串改革其中一個就係改口號。
呢個口號華華聽咗好多年,唔係好覺得有乜問題,點知歐智華接受英國《每日電訊報》訪問時就話,獅子行孭住呢個口號,令到唔同地方嘅員工都抱住同一個價值,就係字面直譯嘅「環球性地區銀行」。

要摒棄「地區」文化

佢解釋,滙控咁多年嚟,買咗咁多資產,業務已經唔似當年香港上海滙豐銀行咁,只做地區零售業務,如果班員工仲抱住只係做一間地區銀行嘅文化去做嘢,係唔得嘅。講起企業文化,佢話見過集團有啲地方嘅部門一個人只管兩個下屬,有啲誇張到自己同自己滙報,暗示個架構累贅,所以先規定要有個八乘八嘅新架構(一個主管head住8個副主管,如此類推)。
講番個口號,華華覺得中文版「環球金融,地方智慧」傳神好多,有埋地方智慧,當地人易接受好多。但最好建立品牌嘅方法,絕對係世紀大供股或者「攞你命三千」消失,呢個宣傳效用更大啦。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載