› 選擇地區
三藩市
紐約
洛杉磯
其他美國地區
香港 台灣 北美
 
2012年05月07日

智取大市:美股現兩大見頂訊號 - 晉佳

之前講過,可以幾個月作為一個周期咁睇,取代過往每幾年一次嘅股市周期,原因係觀察過去10年,港股出現至少8次為期數個月嘅中短線升浪,最持久係沙士過後嘅2003年5月至2004年4月,升勢接近一年;短嘅話,07年8月下旬至10月底嘅升浪,只維持兩個幾月;其餘時間,恒指只會橫行同下跌。所以,每次升市你當只得幾個月就最穩陣。
近期又點呢?睇番呢浸中短線升市由舊年10月初開始,已經行咗7個月,即使仲有水位,都好大機會係尾聲。如果你Miss咗呢次超過半年嘅升浪,作為中長線投資者,高追冇勝算,寧願睇吓個市點樣調整再作打算。
其實,睇美股道指嘅技術走勢,同樣推斷到現階段入市風險高。睇番超長線指標嘅道指14個月RSI,升到差唔多65,觸及02年至今嘅下降通道阻力線。回顧上次升到去下降通道阻力線係舊年4月,之後5至7月道指喺高位整固,8月環球股市就急跌,即係大家都仲未驚完嘅歐債危機。不過,期間道指14個月RSI最低都只跌到50中軸附近,個跌市就已經咁勁,可見呢種大調整威力相當驚人,不能不防,點都要避一避。

港股似派貨格局

另外,之前提過道指過去12年,歷史市盈率形成咗下降軌阻力線,目前升到去13.4倍,已經觸及下降阻力線。計埋上述兩項技術因素,美股現階段風險偏高,更加反映到港股呢一刻嘅風險。
講番港股,上周三火熱咗一日之後,上周四、五繼續冇乜嘢炒,有部份上周三急升股份,去到上周五差唔多蒸發晒升幅,例如保利協鑫(3800)。加上港滙上周五又跌,資金似乎再次流走,橫睇掂睇,港股似派貨格局多啲。如果今個星期冇乜改變,指數股可能會跟住跌。
強勢股普拉達(1913)、騰訊控股(700)一直沿住保歷加通道中軸上升,每次觸及中軸就見支持,然後升幅可達一成。個市得唔得,首先都係睇吓呢批強勢股,如果股價明顯跌穿中軸,加上成個保歷加通道由上傾變為橫行,同時唔見有其他股份取代佢哋嘅強勢地位,相信港股喺高位都好難有支持。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載