› 選擇地區
三藩市
紐約
洛杉磯
其他美國地區
香港 台灣 北美
 
2012年05月10日

金手指:打機有「錢」途爭贏facebook刁 - 孫柏文

在facebook的IPO爭奪戰中,大摩贏咗高盛。 法新社

好多人都知,facebook創辦人MarkZuckerberg係港女心目中嘅筍盤,孫柏文班英文好少少嘅盛女朋友,都想建議佢哋執執之後過去美帝爭下,話晒男未婚女未嫁。創辦人有女人爭,間公司咁值錢就當然更加多人爭,仲要係一班有學識、有事業嘅麻甩佬喺度爭,爭住幫fb搞IPO,十足十球賽咁好睇。

大摩同高盛爭崩頭

呢班麻甩佬分別來自兩間華爾街大行──高盛同大摩,其實呢兩間行鍾意爭科網公司IPO一早有前科,從90年代微軟開始已經係歡喜寃家,到後來Yahoo!、eBay呢啲大路科網公司都係佢哋搞上市,家下佢哋幫手上市嘅公司大概各佔一半,fb呢個咁具歷史性嘅deal,錢重要,面都好緊要。
咁點樣令一間充滿晒IT人嘅公司,相信一間投行幫自己公司上市,孫柏文始終覺得,淨係同呢班IT人溝通已經好難,何況要班IT人信任你幫佢上市,所以之前睇到個科技股前分析員HenryBlodget個blog,講呢兩間大行點出招爭呢次fb招股,好睇過戲。
不過,事先聲明,YouTube創辦人陳士駿講過,當年佢話YouTube概念係由一個派對錄唔到嘢而來,其實係公關度出來。

非一般Banker 愛打機

佢仲爆好多IT公司嘅「傳奇故事」,都只不過係公關橋,以下內容都係上市計劃一部份,信幾成就自己諗。
話說大摩搵咗個叫MichaelGrimes嘅人,專搞科網公司上市,人哋形容佢係個好強、勤力、誠實,不過就有啲怪嘅Banker,因為佢平時會打機打到朝早5點,同孫柏文雙失時一樣,不過佢就返緊工,佢亦都唔似一般Banker,係都要拎個哈佛MBA,反而喺柏克萊讀電子工程同電腦科學,仲要係學士。
最抵死係佢自己個fb嘅相,係一張滑浪嘅相,似玩家多過銀行家。當然,可能都係包裝,有人批評MichaelGrimes搞fb時,搵咗班PR幫佢搞吓wiki同其他同「MichaelGrimes」相關嘅嘢,唔出奇。
咁高盛又用咗乜嘢人去爭呢單生意呢?話晒係投行江湖大佬,佢哋搵咗個沙紙上非常專業,喺哈佛MBA畢業嘅典型銀行家ScottStanford。佢有好多好好嘅投資經驗,被形容係「完美地聰明」。咁話佢點輸呢?Geek仔話佢UI(UserInterface)有事,講嘢好快、好滿口理論。
當然,高盛輸仲有其他原因,例如太遲等等,但拉客呢行無論幾高深都好,最後都只可以靠關係,就係因為MichaelGrimes同滿口經濟用語嘅Banker唔同,之前好多科網公司為咗得到佢嘅建設而投入大摩懷抱,有口碑,當然喺fb爭奪戰上面把握高啲。
不過喺科網投資世界,真係唔可以單靠IPO經驗搵食,唔單止要你明佢講乜,仲要要啲ITGeek仔明你講乜,肯Buy你講乜,始終搞科網都係年輕人,要埋堆先得到佢哋信任嘅。而呢班年輕人,相信會係未來最多有能力搞IPO嘅人,你想一開口悶走佢哋定係起碼都吹兩嘴?

最後大摩排最左手面,贏咗呢場比賽,高盛得第三,所以話呢,時代唔同喇,細個嗰時成日俾阿媽鬧:「打機打電腦無用㗎!讀下書、學下經濟嗰啲仲好啦。」唔知啲阿媽睇咗呢個故事之後,仲會唔會咁鬧呢?

孫柏文
作者為獨立股評人
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載