› 選擇地區
三藩市
紐約
洛杉磯
其他美國地區
香港 台灣 北美
 
2012年05月14日

元朗在線:說好了的拉麪店呢? - 李華華

《記者貼身追擊燒豬黃》
黃君武唔肯停低傾兩句,記者惟有一路跟一路問。 梁鑑章攝

擁有「季季紅」酒樓嘅米芝蓮燒豬股喜尚(8179),上市未夠一年,騎呢事已多過好多有10年股齡嘅公司。早排無啦啦俾人大洗倉唔在講,市傳主席兼大股東黃君武仲要周圍度水,除咗沽5%貨套現2300萬之外,仲俾周刊踢爆佢元朗有叠樓攞咗去「三按」㖭!華華記得黃主席今年1月問公司借咗990萬話要去開拉麪舖,咁家間拉麪店係咪開咗去火星呢?

因為母親節 所以很忙

為咗呢個不解疑團,華華個同事上星期五晨咁早碌入去元朗,趁喜尚舉行股東會,諗住黃主席解吓畫。市場咁多不利傳聞,黃君武似乎一啲都唔care噃,連幾分鐘時間都唔肯畀記者,一完咗股東會就一支箭咁飆走,要記者喺酒樓同佢玩捉迷藏,由房一路追到佢出門口。

記=記者 黃=黃君武
記:你間拉麪舖開咗喺邊呀?
黃:籌備緊呀,搞緊。
記:咁即係預計幾時同喺邊度開?
黃:仲籌備緊,好快㗎喇!
記:市傳你資金周轉唔嚟喎?
黃(即刻停低):你睇吓(酒樓)周圍幾多人!幾好生意!冇資金問題!

華華同事再問佢其他按樓呀、減持呀、洗倉呀,各種問題,黃主席只係不停話母親節,好忙,嗱嗱聲上咗架七人車,同CEO劉蘭英雙雙閃人。叫財務總監黃天競澄清幾句啦,點知佢話「唔使你哋寫」喎。當日隻股份未走樣時,你好似成日高調出嚟做訪問造勢㗎喎!不如你哋私有化咗間公司啦,咁咪唔使再見記者囉,亦費事啲股東眼寃!

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載