› 選擇地區
三藩市
紐約
洛杉磯
其他美國地區
香港 台灣 北美
 
2012年05月21日

金融人語:李嘉誠豐收的一星期

社交網站facebook(fb)上周五終於掛牌,正當人人關心fb為超人身家進賬多少之時,原來李嘉誠另一科網投資——網上串流音樂公司Spotify上周也借fb上市時機,在私人市場融資,公司估值急升。我哋估計,超人在Spotify投資回報最少有15倍,仲和味過fb的投資。
fb首日上市表現麻麻,尾市在保薦人護航下,先能守在招股價之上收市,依然無阻fb成為市值逾千億美元的公司,高過不少科網巨擘。我哋不妨為超人在fb投資回報計計數。他2007、08年共動用1.2億美元買入fb約0.8%股份。不過,李嘉誠今年3月的業績會上首次披露,外界低估了他的投資額。原來佢投資fb的總成本有4.5億美元,比外界預算的還多了3.3億美元。

fb賬面獲利84億

雖然我哋唔知李嘉誠幾時再買入fb股份,但有分析指,好大可能是2011年初透過高盛安排的非公開股權交易入貨,當時fb的估值大約是500億美元。如果傳聞屬實的話,李嘉誠在fb的總投資賬面獲利10.8億美元(約84億港元),回報大約有2.4倍。
來自瑞典Spotify上周承接fb上市的氣勢,打算在私人市場抽水2.2億美元,公司估值將會攀上40億美元,比今年2月估值再增長3倍。這個被視為iTunes主要對手的Spotify,喺08、09年已吸引了李嘉誠的創投公司維港投資,聯同數家創投基金先後投資超過7000萬美元。雖然唔知李嘉誠實際投資金額,但09年超人與其他基金向Spotify泵水5000萬美元時,Spotify的估值只有2.5億美元。對比今日,超人呢手貨在短短三、四年已升值15倍,遠遠超過同期投資fb的回報。
Spotify2006年於歐洲創立,是最先一批利用雲端技術,讓用戶可以透過手機或電腦上網免費聽歌的軟件。李嘉誠睇中Spotify其中一個原因,相信是希望促成與和黃(013)旗下的流動電訊業務合作。
Spotify向音樂公司買歌開支龐大,近年引入無廣告版的月費計畫,嘗試行出一個BusinessModel。公司早兩年引入有份創立fb的帕克(SeanParker)投資,透過帕克幫Spotify接入fb平台,增加用戶互動,谷起用戶數目。現時Spotify活躍用戶就超過1000萬,收費用戶有300萬人。Spotify有今日的估值,fb亦間接有功勞。
Spotify的高估值能否繼續,亦不是毫無懸念。由於Spotify要向唱片商支付巨額版權費用,即使2011年的收入有成4.5億美元,仍然蝕5900萬美元。類似未有BusinessModel的公司好似Pinterest同Instagram近排的估值創出新高,即使都是私人市場發生,股票市場依然相對冷靜,但已有人開始擔心是否科網泡沫重臨的先兆。

歐洲股神進化3D版

《金融時報》上周有篇訪問富達的神級基金經理波頓(AnthonyBolton)的文章,寫法輕描淡寫,卻有足以讓波頓支持者感驚嚇的內容。
深受民企弄虛作假所害的波頓,為咗加強對投資對象的調查,佢話俾FT知,僱用咗五間企業情報公司,對自己基金投資組合內的公司,作深入盡職審查(DeepDueDiligence),通過明查暗訪上市公司的供應商、客戶和競爭對手,望能及早發現公司不尋常的蠱惑招。

查民企 結果嚇死人

呢個3D行動,應該未完成,但係結果已好嚇人,波頓買中咗的其中一家公司,擁有的分店的真實數目,原來只有公司自己聲稱的一半。另一家公司的所謂四大客戶,其中三個客戶都表示,根本不認識這家公司。兩間公司老作成咁,文章冇交代公司名字,亦冇講波頓知道後有乜行動,但可以估到他應該即時沽貨;可惜佢個基金冇玩沽空,唔係冇理由唔反手Short兩間公司,隨時追番唔少回報。
本版《金融雲端》欄作者丘亦生,原來都同一啲內地企業情報公司合作過,佢同我哋講,由於跟內地企業交易信唔過,呢類公司近年越開越多,幫好多外商、機構投資者、會計師行等等做調查工作,針對上市公司做深入盡職審查,係收錢最多的調查工作。這些調查公司由於辦法多、門路廣,有時查吓查吓,甚至會查到公司跟官員勾結的貪腐材料,不過呢啲猛料當然唔會亦冇必要畀晒個客。丘亦生話佢見過一份未經刪減的調查報告,當中提到某部門高官同某富商的金權關係。幾年後東窗事發,官商兩人都被捕,證實調查報告內容係堅料。
丘亦生又話,這些調查公司的老闆及主管,不少係出身自內地公安或法檢系統,有好多非一般的搵料渠道,例如某人的詳盡個人資料,又或曾被公安部門立案調查過的檔案,調查公司都有辦法拎到個File出來睇。具體係點樣做,客戶不能問,亦唔想知。

倚賴八十後少女助手

有「歐洲畢菲特」之譽的富達基金經理波頓,如果揀股策略早啲進化為3D版,或者可以減少損手機會。波頓抵受不住中國故事的誘惑,兩年前押後退休,東來獻技,成立4.6億英鎊的富達中國特殊情況基金,點知水土不服,基金表現不濟,過去一年更深受民企醜聞、爆煲事件影響。香港上市的霸王(1338)、國美(493)、寶姿(589),納斯達克掛牌的西安寶潤和雙威教育等民企,不是醜聞不斷就係賬目出問題,股價大挫已經係小事,寶姿一直停牌;寶潤更已除牌,係波頓輸得最盡的其中一筆投資。
富達中國特殊情況基金的價格,過去一年跌三成,一直跑輸大市,亦長期比NAV有折讓。波頓之前已公開承認,低估投資中國市場的難度,過於依賴報表分析,以後投資前會加強盡職審查。
報表信唔過,波頓亦唔識中文,要揀股就要其他人幫手多做功夫,但係FT話富達的12人中國分析員隊伍,原來都唔熟悉波頓鍾情投資的小型民企;最幫得波頓手的,竟然係佢自己一名助理,一名八十後內地少女DorisYang。
DorisYang在2007加入富達做見習生,波頓讚Doris才能全面,「我可以叫佢研究任何一家公司,佢都可以交出有價值的評估。」我哋查過LinkedIn,富達有一名叫DorisYang的香港員工,任投資分析員,2004入讀北京大學,相信佢就係波頓十分依賴的八十後少女。
FT文章最有意思的一段,係搵嚟接連踢爆民企的渾水話事人CarsonBlock講番兩句,佢以勝利者姿態、語重深長咁話:「來自西方,嗰度個個人屋企都有兩部車、幾部電視,我哋根本唔明白中國人有幾咁渴求金錢,亦唔了解這種渴求點樣影響到人的行為。佢哋情願今天賺盡一元,亦唔會等待之後幾年每年賺你兩元。」CarsonBlock曾經在上海創業被騙,他的切膚之痛和覺悟,波頓現在應該有共鳴了。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載