› 選擇地區
三藩市
紐約
洛杉磯
其他美國地區
香港 台灣 北美
 
2012年05月21日

中門大開:萬骨枯 - 添馬男

曾鈺成強行「剪布」,為振英重組而被犧牲。

無間道內韓琛話自己條命係「一將功成萬骨枯」,睇怕呢句批命都適合用在振英身上。首先為捧佢登基,一手破壞了80年代基本法起草以來,統戰及穩住大資本家的工作,難以想像李嘉誠、李國寶多年來協助中央對港工作的大孖沙,最終會有這樣下場,李國寶甚至表示多年從政係浪費時間。

曾鈺成慘賠上公信力

第二個被犧牲係曾鈺成,毓民拉布戰之所以受關注,當然唔係乜嘢民生議題;一手樓監管或競爭法,呢啲法案一旦提交立法會,必定可以插隊。真正影響係火燒連環船,骨牌效應,令振英五司十四局重組失敗,無法在6月下旬完成,到領導人來港主持就職時,唔能夠齊齊整整宣誓,純粹係下屆政府冇面而已!但為了終止拉布戰,曾鈺成自我燃燒,不正常運用會議常規,終止辯論,第二日黃雨怕流會,又押後半小時開會,連環出招保住法例上枱。最近佢登上十大議員之首,係因為2及3月特首選舉期間,言論中肯,穩站主流民意所致。
今次佢為振英重組而被犧牲,一手摧毀自己作為議長的公信力,介入議會兩大陣營黨派之爭。佢好大可能賠上自己政治前途,9月當選應無問題,但再任立法會主席則有暗湧。
如果佢自我犧牲可以一勞永逸解決拉布戰還算值得,但係人都知替補機制法案在5月底成功表決後,仲要面對其他拉布。若政府主動撤回版權條例或可以減少拉布機會,但重組決議案及有關撥款也有相當多拉布空間。首先在事務委員會討論新設局長可以被拖延,大會決議案表決可拉布,再去人事編制委員會及財委會傾,一樣可以拖。
重組是純政治角力問題,振英強行同民生綑綁,就今次替補拉布所見,民生綑綁冇太大幫助,策略上係錯誤。振英急於求成,梁營使命感爆棚,人人心口有勇字,如此下去,建制派會折騰至死去活來,日後政務官命運也一樣。
唔信?曾主席已是最佳人辦!
添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載