› 選擇地區
三藩市
紐約
洛杉磯
其他美國地區
香港 台灣 北美
 
2012年05月22日

金手指:釣金龜兩招必殺 - 孫柏文

上個禮拜接二連三嘅壞消息,到咗上周末已到達一個大家慣咗嘅地步。孫柏文已經好耐未見過噚日個市況,即全日埋單時只係郁咗29點,仲要全日波幅都係好細。
G8開會話佢哋撐希臘留喺歐元區,市場唔郁係因為聽到後問:「唔通可以話唔撐咩?睇吓下一步棋點算把啦。」其實如果之前嗰轉08年金融海嘯,令大家成為次按債券專家,我相信今次歐債亦令大家成為歐洲、特別係歐國之間關係嘅大師。到呢刻,大家知嘅嘢同一般喺華爾街返工嘅Banker差唔多。
上周末時有另一個冇乜報道嘅新發展,我覺得大家要留意︰法國第二大地產發展商旗下嘅財務公司發咗債,債價喺近呢幾個禮拜開始插,個勢似07年中評AAA同AA嘅次按。呢間財仔,就係為呢個發展商賣樓時,為買家提供貸款。
法國傳媒直情叫呢間嘢做法版NorthernRock(北石),呢個名係咪似曾相識呢?當年北石爆完,英國樓市爆,今次會唔會喺法國樓市發生?法國樓市喺07年前冇狂升,08年輕跌,不過之後因低息所以開始穩步上揚。黑天鵝作者話齋,之前越穩定嘅趨勢,一爆就大煲,法國樓市之前咁穩定,一旦跌,全行出事。

點先嫁到朱克伯格

最驚係,當法國啲銀行,因為手上嘅歐豬債已令市場開始驚佢哋唔夠資本,法樓市爆會唔會令佢哋被一沉百踩咁資不抵債?大家留意。最後要講PriscillaChan。相信好多港女想學佢,搵個有錢,SorryImean有才華嘅丈夫。佢同朱克伯格喺Frat派對等廁所時識,我當年喺花旗國讀書時,都冇聽過港女去過。點都好,佢哋嘅故事令我為盛女繼M記、Economist、TED後加兩個建議。一、飲多啲水等要去廁所,二、去花旗國啲好學校嘅Frat派對。唔知乜叫Frat?睇吓《AnimalHouse》啦。

孫柏文
獨立股評人
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載