› 選擇地區
三藩市
紐約
洛杉磯
其他美國地區
香港 台灣 北美
 
2012年05月22日

中門大開:小妹當官 - 添馬男

許曉暉的問題不在於對文化政策的理解,而是給其他潛在之選比下去。

新政府公開招副局政助,交五人小組遴選,都幾搞嘢。香港問責制越搞越騎呢,主因係欠缺一個專業的政治社群。中國人傳統歧視專業政客,文化人做官,詩書畫件件皆能,文章名滿天下,但為官時有乜建樹,寫過乜嘢重要奏章,評議施政,大家都唔多關心。總之一句到尾,就係朝中奸臣當道,大志難伸,惟有寄情山水詩文,好似典型麥兜式故事情節,有頭有尾,但就冇中間情節。
香港政治階層的來源好窄,一是政務官,其次是政黨、議員、再其次是學者、傳媒人。要晉身政治階層,必須有專業的政治歷練,而並非由專業人士直接過檔。一個成功的專業人士,不一定係成功的政治人,有時反而會有阻礙。因專業人士自恃專業知識,因而對其他人有種傲慢,唔容易接受「門外漢」建議。

政治歷練重要過學歷

乜嘢叫專業政治歷練,當然唔只係做社團內的「小妹」,在同鄉會、慈善團體做活動聯絡或秘書。首先佢哋要有一套理念,有政治分析能力,最緊要係懂得政治溝通,將複雜的政策及政治議題,轉化成大眾語言,引發公眾討論。而獲取這些技能,某些行業如傳媒人、大狀、社工有先天優勢,但這只係起步點。如果在學時參與學生組織,學懂會議技巧、辯論能力,面對同學質詢,敢於公開發言,對日後專業從政肯定有好大幫助。畢業後加入政黨、智庫、專業團體、社運組織,也可培育政治技能。呢種歷練先至係踏入專業政治第一步。
煲呔遴選副局政助為人詬病,係因為主事者前任特首辦主任陳德霖用一種「去政治」標準去揀人,要靚CV,要名校或大機構出身,反而有政治歷練,出身NGO、智庫,對政治有睇法嘅人就大部份落選。副局中如陳維安、許曉暉都係「去政治」標準下成功入圍的代表人物。難怪前線記者批評許曉暉至今背誦新聞稿LineToTake一字不漏,但完全欠缺政治人的溝通技巧。

許曉暉從未打過硬仗

做文化局長,不一定需要專業文化人,正如教育局長,不一定要教育學院校長。許曉暉問題不在於對文化活動興趣或文化政策的理解,而是同黃英琦、張炳良相比,佢根本係一個未夠班、政治歷練不足的政治人。五年副局長生涯,除了主持開幕剪綵、社團聯歡交誼外,有邊場政治硬仗見過佢,有邊一次演說曾令人記得。振英高舉用人唯才招牌,要求官員有政治能力,是對症下藥,明白曾蔭權擴大問責制戇居之處,但若組閣用人不當,自己砸了自己招牌,最後又變回老董式假大空口號治港。

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載