› 選擇地區
三藩市
紐約
洛杉磯
其他美國地區
香港 台灣 北美
 
2012年05月24日

金手指:懇求妳可否來個了斷 - 孫柏文

希臘就係嗰啲借錢借到還唔到、等「放榜日」嘅債仔,何不及早來個了斷? 法新社

早幾日,約咗個前輩食午飯,當孫柏文行緊去餐廳時,咁啱撞到呢個前輩。咁我哋一齊行去餐廳,經過某連鎖式藥房時,佢話想睇吓裏面有冇補給品,可以幫佢夜晚瞓覺。咁我問:「你夜晚瞓唔着?」
點知個前輩話:「其實唔係,只係天光時我就會扎醒。」咁我記得我個醫生阿妹曾經講過,話夜晚瞓唔着可以有一百幾十個理由,不過,如果朝早忽然自動扎醒就應該係心結。所以我問前輩,呢排係咪有啲嘢煩。

借到還唔到 總有埋單時

前輩話佢喺英國留學嘅女,今年高考,唔知入唔入到心儀嘅大學,咁我聽完就話呢個早醒問題,放榜之日,應得解決。佢聽完之後,笑一笑話:「我諗都係。」之後就一齊繼續去餐廳食飯。
今日分享呢個故事,係因為我覺得我哋特區股民集體唔係一樣咩?讀書有「讀書地心吸力論」,即冇讀書考試,放榜日會有應有成績。經濟、理財一樣,當你借錢借到肯定還唔到,都會有計數嗰日。
希臘、西班牙、葡萄牙等,對於我哋香港人來講,就係嗰個借錢借到還唔到、等「放榜日」嘅債仔。我哋家個個都等緊個「放榜日」,好、壞,點都好,來個了斷。點知歐盟、歐央行、德國等選擇一路拖,係咁拖。入市出市?根本冇晒意欲。
考試成績好咪入大學囉,考得唔好咪諗出路,起碼大家知個情況係點,有個了斷,繼續上路。希臘要放棄歐元,咪做囉,之後係點起碼可以繼續上路,點知喺一味拖嘅情況下,特區人就企定。企定呢個動作,喺現今情況下絕對正確,喺歐洲未計數之前,候任特首梁振英點做嘢,都係冇可能扭轉呢種心態,甚至觀察呢幾日中央放風聲再大搞基建,個市都唔郁嘅情況下,連中央都氹唔到香港人。

其實我見大家睇定啲嘅心態,非常鼓舞,因為全球啲人點樣甘願被呃,仲有我哋香港人嘅眼睛係雪亮嘅,明白冇嘢敵得過「金融地心吸力」。所以如果劉皇發可以代表港人每年求簽,毋須直選(題外話,我覺得一人一票選每年代表港人嘅「求簽代表」,同一人一票選立法代表嘅重要性有過之而無不及),我就自行作全港股民嘅代表,向歐洲要求佢哋嘅歐洲債務危機,可唔可以來個了斷呢?Bitte、s'ilvousplait——懇求妳。

日本政府負債 衰過希臘

不過講到「金融地心吸力」,就要講啲仲係違反「金融地心吸力」嘅地方,呢個地方就係日本。話佢哋反「金融地心吸力」嘅原因,係因為佢哋政府嘅負債程度,遠比希臘要差。希臘債息升幾個百分點足以觸發危機,日本?升幾個Basispoint都可即時Gameover。
即係理論上,日本債息一觸即發,作為聰明嘅對冲基金經理,當然會拋空等時辰到。點知,日本債券不但唔跌,仲要越升越有,令拋空嘅人被挾瓜,所以拋空日債呢個盤,亦被老外叫做Widowmaker,粗略翻譯就係「造寡婦嘅英雄塚」。早排,仲要有我其中一個偶像KyleBass成為呢個Trade嘅傷者。雖然,日債未爆只係時辰未到,不過有如每個填鴨式教育Econ產物都識嘅Keynes話齋,市場非理性嘅時間,可以長過你捱得住嘅時間好多。
呢位KyleBass,上轉次按都捱咗好多年,先等到佢爆,希望今次佢都可守得雲開見月明。

孫柏文
作者為獨立股評人
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載