› 選擇地區
三藩市
紐約
洛杉磯
其他美國地區
香港 台灣 北美
 
2012年05月24日

樂香園:潮牌I.T睇錯市? - 海迪

由潮人沈嘉偉打骰的I.T(999),3月中開始股價跌不停,海迪聞說管理層早幾個月前已經同證券界吹風,全面調低2012年度的各項預測,所以被人狂沽實屬正常。
據市場講法,I.T呢次截至2月底止嘅全年業績,相信會令大家失望,存貨金額可能會再創新高(即超過10億),存貨周轉天數亦會繼續高企(約半年)。I.T明天正式放榜,海迪等睇呢個講法啱唔啱。
海迪作為I.T嘅顧客,閒時都幫襯唔少,早排不停接到佢地打電話嚟通知我去pre-sale,就明白佢哋貨底有幾重。尤其係上一個冬季,基本上可以用割喉式減價來形容情況慘烈,聽講內地減得仲勁啲添。呢種「要錢唔要貨」嘅態度,令海迪諗起08年金融海嘯,I.T都用過呢招。海迪真係強烈質疑沈嘉偉又再一次睇錯市,去年中以為零售市場形勢大好,所以加重咗入貨同擴張,點知遇到零售市場急放緩,走得太快煞唔切掣,就即刻瀨嘢。
曾經有長期和I.T合作嘅Banker向海迪形容,唔好睇沈嘉偉鍾意揸跑車咁型,其實佢係一個作風好穩健保守嘅人。海迪都相信I.T唔會出事,不過要改善返個業績同現金流,起碼都仲要一段日子。
海迪

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載