› 選擇地區
三藩市
紐約
洛杉磯
其他美國地區
香港 台灣 北美
 
2012年05月30日

中環在線:中銀小股東哀歌
為了紀念鈔冇咗條命 - 李華華

中銀紀念鈔狂潮,一度係城中盛事,點知有人歡喜有人愁。

中銀香港(2388)噚日舉行股東大會,小股東家問嘅問題越嚟越專業,資本充足比率呀、派息率呀,全部識問又記得晒啲數字。華華以為個股東會就咁平平淡淡完了,點知有個小股東忽然喊住咁控訴中銀冇人情味,嚇到在場記者「嘩」咗一聲。

兒子投訴:不近人情

事緣一位叫文先生嘅小股東,由開始發問已經聲震震似想喊咁款。佢提到之前申請中銀紀念鈔,一家人都中晒,鬼咁開心,點知呢件咁開心嘅事,竟然係佢一家人悲劇嘅開始。文先生爸爸因為去中銀攞紀念鈔,過馬路時竟然俾架車撞到,最終不治。講到呢度,文先生已經頂唔順哽咽,在場更加有行家聽到眼濕濕,華華個心都沉咗一沉……
事後,文先生諗住幫佢爸爸攞番張紀念鈔,送佢最後一程,點知中銀話只可以由佢爸爸本人去攞。文先生投訴中銀不近人情,話晒佢以兒子身份去攞,如果中銀知道人哋一家遭逢不幸,係咪應該酌情處理呢?中銀管理層即場叫呢位文先生喺股東大會後留低,話會有員工同佢跟進。
規矩係死嘅,中銀應該畀番小小人情味出嚟,再唔係,送過一張畀文先生,還佢老爸個心願都好嘛。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載