› 選擇地區
三藩市
紐約
洛杉磯
其他美國地區
香港 台灣 北美
 
2012年05月31日

中門大開:哽咽的政治 - 添馬男

舊區僭建、劏房問題嚴重,林鄭未有優先處理,反而先去對付新界鄉民。

話說當年陳太受了委屈,在辦公室內哭過多次。下任政務司林太,上電台講起馬頭圍塌樓,語調哽咽。唔知點解,女高官總係好感性地抒發政治感受,其他人唔知,我就唔多受落。政客眼淚,戲假情真,但靠真情辦事,就好唔專業。如果用呢個方法去曲線推銷振英五司十四局重組,就直頭虛偽。

塌樓後 劏房問題冇改善

衡量林太是否對馬頭圍死難者的真情,公眾只有一個標準,就係塌樓至今劏房問題係嚴重咗,定係紓緩咗。佢有冇用全力推動政府上下處理舊區僭建,重新提出安置政策。上星期《壹週刊》先在封面故事訪問工廈劏房大王,標題係引述大王評語:「林鄭廢嘅!」
冇安置政策,巿區舊樓僭建及劏房係蜜蜂竇,冇人想掂,只有等下一次塌樓意外發生,林司長又出來感性地抒發自己內心。僭建問題折騰社會,施政優先次序係由問責局長去定,應否將有限資源優先去處理舊區樓宇安全,抑或去對付新界鄉民呢?打梁福元,人人叫好,土豪劣紳乞人憎,有助提升民望。反之做好政策扶助基層,要辦實事,要擺平各級大小官僚,同其他局和衷合作。捨難行易,人之常情。

政客抽水 打倒今日的我

政客擇肥而噬無可厚非,但抽水總有限度,今日林太仍是現屆官員,即使要助振英推銷重組,也要考慮清楚,不能輕易打倒今日之我。因為重組架構必然涉及現屆分工的不足,否則又何苦勞師動眾重組呢?當日設發展局,係因為煲呔主打十大基建及保育,針對董朝大型基建議而不決、決而不行。同時在05、06年間湧現的保育浪潮,政府要作回應。當時住房問題未惡化,並非施政優先。而日後土地供應失衡,源於政府在孫九招後停止造地,恢復定期賣地又一拖再拖,發展局更是責無旁貸。
振英及梁營多次抨擊房策失誤,局長鄭汝樺選擇不留任,是個有原則之人。本屆政府多人留下,他們究竟擺出一個甚麼政治姿態,是否為討好新政府新老闆而匆忙上陣打倒今日之我,政務官常秘全部看在眼裏。政客追逐權力、民望時,也應留意食相不能太差。
添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載