› 選擇地區
三藩市
紐約
洛杉磯
其他美國地區
香港 台灣 北美
 
2012年06月11日

智取大市:殘股逆市升港股衰唔晒 - 晉佳

人民銀行上星期四晚突然宣佈減息,當晚大家都好興奮,但原來係一場「誤會」,因為存款息率上浮區間設定喺1.1倍,喺銀行五行欠水下,將令銀行爭相上調存款息率嚟搶存款,所以息差註定收窄,內銀股當災。
事實上,相關股份上星期五跌勢亦最急。就係呢個誤會,令大市由升變咗跌,希望變成失望,信心跌入低谷。
唔計內銀股嘅話,恒指上星期五跌47點,至於之前弱勢嘅保險股、煤炭股,都能夠逆市上升,超賣概念似乎衰唔晒;個別重債股份受惠減息更逆市大升,強勢到不得了嘅內房股繼續急漲。氣氛唔好但係低殘股份反彈,未見有Freefall動力,大戶似乎唔係全面睇淡,所以造淡一樣有風險。
人行減息,但美國聯儲局主席伯南克冇提過QE3,歐洲央行議息後又冇動靜,要期望政府救市已經不切實際。最大機會帶嚟反彈嘅因素,反而係最危險嘅因素──希臘大選。
投資者從來厭惡不明朗因素,尤其係家歐債危機越演越烈,隨時乜嘢都爆煲,所以投資者做定最壞打算,沽貨先算。大家最近好驚6月17日希臘嘅大選結果,呢場被視為緊縮政策嘅公投,支持嘅保守黨新民主黨同佢哋嘅陣營,同反對嘅激進左翼聯盟,似乎勢均力敵。希臘即時GameOver,機會就當五五波。

希臘大選前勢波動

既然件事攞得嚟公投,晉佳就用番正常人嘅想法代入希臘嘅處境。係人都知道緊縮政策肯定會痛苦,人工要減,政府開支又要削減,生活一定困難;不過,萬一希臘脫歐,重新用番自己貨幣德拉克馬,滙價大跌一樣會令經濟情況變得惡劣,前景一樣有變數。再者,冇人天生想做衰人,兩害取其輕,希臘人最後關頭唔一定會投票畀激進左翼聯盟。
希臘變數令港股大幅波動嘅機會似乎唔細,相信呢個星期亦會有春江鴨做嘢,大家預咗希臘大選前,投資者都係得個驚字,如果港股反而逐步回升,個股有低位反彈迹象,似乎就反映希臘新民主黨勝出機會高啲,所以投資者短線就唔好睇得咁淡,可以留啲貨底,博希臘大選後環球股市急彈。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載