› 選擇地區
三藩市
紐約
洛杉磯
其他美國地區
香港 台灣 北美
 
2012年06月14日

金手指:點解升市咁短癮? - 孫柏文

今日要講幾樣嘢,入正題。噚日,孫柏文喺中環行街時,被好幾個fan屎截停。佢哋都係問同一條問題:「點解西班牙收千億(歐元.下同),攞去救銀行,個市興奮完一日就冇料到?」咁見咁多人問,我就喺呢度答多次。
市場咁快玩完呢鋪「救市」方案,原因有二。第一,就係呢1000億元係全個歐元區一齊出錢,跟住問西班牙收3厘息。即希臘、愛爾蘭、希臘等理論上都要夾。希臘、愛爾蘭我都唔講有冇錢夾,淨係睇意大利就知呢個方案唔掂,因為意大利如果要夾錢,佢哋就要借。咁意大利借錢嘅利息係6厘,跟住收3厘利息?聽落都知係流嘢。

法國似足當年雷曼

夾唔到錢都算,夾到仲大鑊,此為原因二。點解?因為歐元區啲話事人最驚係國債利息扯上,呢個救市方案係會越泵水越令債息飆升。理由係呢筆錢,歐盟話到明係還錢排隊時,會排先。
有乜問題?例如以前2000億元國債,你係國債持有人,一旦西班牙走數要債務重組,例如輸四成,大家就會平起平坐咁一齊輸800億元,平起平坐呢個概念叫做Paripassu。不過如果都係2000億元,家係有1000億元排先攞錢,一旦你係後面嗰班債仔,一樣要輸800億元時,就唔會係輸四成,係輸八成。
喺咁嘅情況下,你由排第一平起平坐攞番錢,到忽然躉到後面(英文叫subordinated)時,仲唔沽啲國債?咁個個沽時,國債利息扯上,危機更危,股市仲唔跌?而呢個救市方案,係針對西班牙啲資不抵債嘅銀行,如果係銀行為中心,啲人就會開始望邊個歐元區國家都有啲大到自己政府救唔到嘅銀行系統,即係遲早會望住法國。
我家望住呢個西班牙方案,感覺好似當年08年初BearStearns爆煲咁。而今日嘅法國?就係08年初嘅雷曼。
咁喺特區股市中,其中一隻最有歐洲概念股味道嘅公司,就係噚日晏晝停牌前已跌逾兩成嘅思捷環球(330)。噚日開市無耐,我收到個輪商朋友嘅短訊,話有兩隻思捷Put輪升到甩轆。咁開電腦睇,發現冇一隻係個朋友間行出嘅。而其中東亞銀行(023)出嗰隻,不但升得多,仲要街貨量好大,希望佢哋有對冲啦,因為冇的話,就又體驗東亞同衍生工具真係唔係好夾。
最後,想Update大家關於我上個禮拜一連兩篇文講過嘅星獅地產(535)。呢間公司嘅母公司想私有化間公司兼除牌,我上星期都解釋過因呢間公司未計某啲資產落資產淨值計算,所以之前嘅私有化建議價係大幅低過合理價錢。

星獅成交飆 博提價

咁呢間公司嘅母公司星獅集團,係間新加坡公司,主席仲要係李光耀個仔、軍人出身嘅李顯揚。我就話過之前計漏資產,應係無心之失,公司出正式建議時,會撥亂反正。咁今日要Update嘅嘢係,噚日星獅地產嘅成交量不但大幅飆升,仲要收市價係啱啱好係之前嘅初步建議私有化價,即噚日買嘅人,如果冇提價,就會輸經記佣金同釐印,即係佢哋一定博提價。我只可以話,如果星獅地產私有化提價,就係肯定《蘋果日報》喺新加坡嘅影響力,因為李顯揚都睇《金手指》!

孫柏文
作者為獨立股評人
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載